തിരുവനന്തപുരം: സംസ്ഥാനത്ത് വീണ്ടും കൊറോണബാധ സ്ഥിരീകരിച്ചു. ചൈനയില്‍ നിന്നും തിരിച്ചെത്തിയ വിദ്യാര്‍ഥിക്കാണ് കൊറോണ ബാധിച്ചതെന്നാണ് വിവരം. ഇപ്പോള്‍ രാജ്യത്തും സംസ്ഥാനത്തും കൊറോണ ബാധിച്ച ആളുകളുടെ എണ്ണം മൂന്നായി. കാഞ്ഞങ്ങാട് താലൂക്ക് ആശുപത്രിയില്‍ ചികിത്സയില്‍ കഴിയുന്ന ഒരാള്‍ക്കാണ് കൊറോണ ഇപ്പോള്‍ സ്ഥിരീകരിച്ചത്. ആരോഗ്യമന്ത്രി നിയമസഭയിലാണ് ഇക്കാര്യം അറിയിച്ചത്. രോഗിയുടെ മറ്റ് വിവരങ്ങളൊന്നും മന്ത്രി വ്യക്തമാക്കിയിട്ടില്ല. ഈ വിദ്യാര്‍ത്ഥിയുടെ ആരോഗ്യനില തൃപ്തികരമാണെന്നും റിപ്പോര്‍ട്ടുണ്ട്. രോഗം സ്ഥിരീകരിച്ച മറ്റ് രണ്ടു പേരും ചൈനയില്‍ നിന്നെത്തിയ വിദ്യാര്‍ഥികളായിരുന്നു.
ഏത് അടിയന്തര സാഹചര്യവും നേരിടാന്‍ ആരോഗ്യവകുപ്പ് ഒരുക്കമാണെന്നും എല്ലാ സജ്ജീകരണങ്ങളും ആശുപത്രികളില്‍ ഒരുക്കിയിട്ടുണ്ടെന്നും മന്ത്രി നിയമസഭയില്‍ വ്യക്തമാക്കി. രോഗം വ്യാപിക്കാതിരിക്കാന്‍ മുന്‍കരുതലുകള്‍ സ്വീകരിച്ചു വരികയാണെന്നും മന്ത്രി വ്യക്തമാക്കി.
