തണ്ണിത്തോട് : കരിമാന്തോട്ടില് യു.ഡി.എഫ് തെരഞ്ഞടുപ്പ് പ്രചരണ പരിപാടിയില് പങ്കെടുത്തുകൊണ്ടിരുന്ന ജില്ലാ പഞ്ചായത്ത് അംഗം എം.വി അമ്പിളിയെ കയ്യേറ്റം ചെയ്ത സംഭവത്തില് പ്രതിക്കെതിരെ മാതൃകാപരമായ ശിക്ഷാനടപടികള് സ്വീകരിക്കണമെന്ന് കെ.പി.സി.സി വക്താവ് അനില് ബോസ് ആവശ്യപ്പെട്ടു. സി.പി.എം ആക്രമണത്തില് പ്രതിഷേധിച്ചുകൊണ്ട് യു.ഡി.എഫ് തണ്ണിത്തോട് മണ്ഡലം കമ്മറ്റിയുടെ നേതൃത്വത്തില് സംഘടിപ്പിച്ച പ്രതിഷേധ മാര്ച്ച് ഉത്ഘാടനം ചെയ്തുകൊണ്ട് സംസാരിക്കുകയായിരുന്നു അദ്ദേഹം. കോന്നി മുന് എം.എല്.എയും റവന്യു വകുപ്പ് മന്ത്രിയുമായിരുന്ന അഡ്വ.അടൂര് പ്രകാശ് തണ്ണിത്തോട്ടില് വിതരണം ചെയ്ത പട്ടയം ഇടതുപക്ഷ സര്ക്കാര് റദ്ദ് ചെയ്തതുമായി ബന്ധപ്പെട്ട വിഷയം സംസാരിക്കുമ്പോള് ആണ് കയ്യേറ്റ ശ്രമം ഉണ്ടായത്.
ഇത്തരക്കാരെ മാതൃകാപരമായി ശിക്ഷിക്കണം. എം.എല്.എ യുടെ നിലവാരം പോലുമില്ലാതെ പ്രവര്ത്തിക്കുന്നവരുടെ വാക്കുകേട്ട് യു.ഡി.എഫ് പ്രവര്ത്തകരുടെ നേരെ വന്നാല് തിരിച്ചടിക്കുമെന്നും അദ്ദേഹം പറഞ്ഞു. പ്രതിഷേധമാര്ച്ച് തണ്ണിത്തോട് പോലീസ് സ്റ്റേഷന് പടിക്കല് പോലീസ് തടഞ്ഞു. കോണ്ഗ്രസ് തണ്ണിത്തോട് മണ്ഡലം പ്രസിഡന്റ് ബിജു മാത്യു അധ്യക്ഷത വഹിച്ചു. എ.ഐ.സി.സി വര്ക്കിംഗ് കമ്മറ്റി അംഗം രുദ്രരാജ് മുഖ്യ പ്രഭാഷണം നടത്തി. യു.ഡി.എഫ് ചെയര്മാന് എബ്രഹാം വാഴയില്, തണ്ണിത്തോട് പഞ്ചായത്ത് പ്രസിഡന്റ് ലില്ലി ബാബു, അജയന്പിള്ള ആനിയ്ക്കനാട്ട്, റോയ് ജോര്ജ്ജ്, ജോണ്, സജി കളയ്ക്കാട്ട് തുടങ്ങിയവര് സംസാരിച്ചു.
