തൃക്കരിപ്പൂർ : സന്ദീപ് വാര്യരുടെ റോഡ് ഷോയ്ക്കിടെ തൃക്കരിപ്പൂരിലുണ്ടായ വ്യാപക സംഘർഷവുമായി ബന്ധപ്പെട്ട് 180 പേർക്കെതിരെ പോലീസ് കേസെടുത്തു. 100 എൽഡിഎഫ് പ്രവർത്തകർക്കെതിരെയും 80 യുഡിഎഫ് പ്രവർത്തകർക്കെതിരെയുമാണ് നിലവിൽ കേസ് രജിസ്റ്റർ ചെയ്തിരിക്കുന്നത്. കഴിഞ്ഞ ദിവസം നടന്ന സംഘർഷത്തിൽ പ്രദേശത്തെ സിപിഎം, കോൺഗ്രസ് ഓഫീസുകൾ ആക്രമിക്കപ്പെട്ടിരുന്നു. യുഡിഎഫിന്റെ ജാഥ കടന്നുപോകുന്ന സമയത്ത് സിപിഎം കേന്ദ്രമായ പടന്നകടപ്പുറത്ത് വെച്ചാണ് അക്രമ സംഭവങ്ങൾ അരങ്ങേറിയത്.
വൈകുന്നേരങ്ങളിൽ നാട്ടുകാർ സാധാരണയായി ഒത്തുകൂടാറുള്ള പ്രദേശമാണിതെന്നും ജാഥ വരുമ്പോൾ പ്രകോപനം ഒഴിവാക്കാൻ പോലീസ് നിർദ്ദേശിച്ചതനുസരിച്ച് ആളുകൾ മാറിനിന്നിരുന്നുവെന്നും റിപ്പോർട്ടുകളുണ്ട്. എന്നാൽ ജാഥയുടെ ഭാഗമായി എത്തിയ ബൈക്കുകൾ ഭീകരമായ ശബ്ദം ഉണ്ടാക്കിയതോടെ കാര്യങ്ങൾ കൈവിട്ടുപോവുകയായിരുന്നു. സംഭവത്തിൽ നിരവധി പേർക്കെതിരെ നടപടിയെടുത്തിട്ടുണ്ടെന്ന് പോലീസ് അറിയിച്ചു.
