തൃശൂര്: തുമ്പൂര്മൂഴിയില് കാലടി സ്വദേശിനി ആതിരയെ കൊലപ്പെടുത്തിയ സംഭവത്തില് പ്രതി അഖിലിന്റെ കുറ്റസമ്മതമൊഴി പൂര്ണമായും വിശ്വസിക്കാതെ പോലീസ്. കടം വാങ്ങിയ സ്വര്ണവും പണവും തിരിച്ചുചോദിക്കുമെന്ന ആശങ്കയില് ആതിരയെ കൊലപ്പെടുത്തിയെന്നാണ് അഖില് പറയുന്നത്. എന്നാല് ഇതുവരെ ആതിര സ്വര്ണവും പണവും തിരിച്ചു ചോദിച്ചിട്ടില്ലെന്നും അഖില് പോലീസിനോടു പറഞ്ഞിട്ടുണ്ട്. ഭാവിയില് സ്വര്ണവും പണവും തിരിച്ചു ചോദിക്കുമെന്ന ആശങ്കയില് ഒരാള് കൊലപാതകം നടത്തിയെന്നത് പൂര്ണമായും വിശ്വസിക്കാവുന്നതല്ലെന്നാണ് പോലീസ് പറയുന്നത്.
വനത്തിനുള്ളില് വച്ച് എന്താണ് സംഭവിച്ചിരിക്കുകയെന്നതില് വിവരം ലഭിക്കുമോയെന്നാണ് പോലീസ് ശ്രമിക്കുന്നത്. ഇരുവരും തമ്മില് നേരത്തെ ഭിന്നതയൊന്നും ഉണ്ടായിട്ടില്ല. അങ്ങനെയുണ്ടെങ്കില് ആതിര അഖിലിനൊപ്പം പോവാനിടയില്ലെന്നാണ് പോലീസ് കരുതുന്നത്. വനത്തിനുള്ളില് മറ്റെന്തെങ്കിലും സംഭവിച്ചിരിക്കാനും അതില് ഇവര് രണ്ടു പേരും അല്ലാതെ മറ്റാര്ക്കെങ്കിലും പങ്കുണ്ടായിരിക്കാനുമുള്ള സാധ്യത പോലീസ് തള്ളിക്കളയുന്നില്ല. സംഭവത്തില് അന്വേഷണം ഊര്ജ്ജിതമാക്കിയിരിക്കുകയാണ് പോലീസ്. ആതിരയില് നിന്നും ആഭരണങ്ങള് വാങ്ങിയ പോലെ പ്രതി അഖില് മറ്റേതെങ്കിലും സ്ത്രീകളില് നിന്നും സ്വര്ണ്ണമോ പണമോ വാങ്ങിയിട്ടുണ്ടോ എന്നും പോലീസ് പരിശോധിക്കുകയാണ്.
