വയനാട് : കൊളവള്ളിയില്‍ ജനങ്ങളുടെ ജീവനു ഭീഷണിയായി കടുവ. കടുവ സ്ഥലത്തുണ്ടെന്ന് വ്യക്തമായതോടെ കര്‍ഷകര്‍ ആശങ്കയിലാണ്. കന്നുകാലികള്‍ക്ക് പുല്ലരിയാനും പശുക്കളെ പുറത്തു കൊണ്ടുപോകാനും തോട്ടത്തില്‍ പോകാനും ആളുകള്‍ക്ക് ഭയമാണ്.
കടുവ കൊന്ന നായ്ക്കളിലൊന്ന് ഇന്നലെ രാവിലെ മുറ്റത്തുണ്ടായിരുന്നെന്ന് പ്രദേശവാസിയായ സ്വാമി പറയുന്നു. രാവിലെ വീട്ടുകാര്‍ ക്ഷീരസംഘത്തില്‍ പാല്‍ നല്‍കാന്‍ പോയപ്പോള്‍ നായ ഒപ്പമുണ്ടായിരുന്നു. അതിനു ശേഷമാണ് കടുവ പിടിച്ചത്. വീട്ടില്‍ നിന്ന് 50 മീറ്റര്‍ മാത്രമകലെ കഴുത്തിന് ആഴത്തില്‍ മുറിവേറ്റ നിലയില്‍ ചോരയൊലിക്കുന്ന നിലയിലാണ് തിരച്ചില്‍ സംഘം നായയുടെ ജഡം കണ്ടെത്തിയത്.
ആളുകള്‍ കൂട്ടംചേര്‍ന്നാണ് രാവിലെ പാല്‍ നല്‍കാന്‍ പോകുന്നത്. സന്ധ്യയാകുന്നതോടെ ഗ്രാമങ്ങളില്‍ ആളനക്കമില്ലാത്ത അവസ്ഥയാണ്. ക്യാമറയില്‍ കടുവയുടെ ദൃശ്യം പതിഞ്ഞാല്‍ കൂട് സ്ഥാപിക്കുന്നതടക്കമുള്ള നടപടികള്‍ വേഗത്തിലാക്കുമെന്ന് അധികൃതര്‍ അറിയിച്ചു.
ഓര്‍ത്തഡോക്സ് പള്ളിയുടെ സമീപത്തെ തോട്ടത്തിലൂടെ കടുവ നീങ്ങുന്നതായി കണ്ടുവെന്ന വിവരത്തെ തുടര്‍ന്ന് ഉച്ചവരെ തിരഞ്ഞുവെങ്കിലും കണ്ടെത്തിയില്ല. കടുവയെ കണ്ടതായി പലരും പറയുന്നുണ്ടെങ്കിലും വനപാലകരാരും കണ്ടിട്ടില്ല. ഇന്നലെ പ്രദേശം അരിച്ചുപെറുക്കി തിരച്ചില്‍ നടത്തിയിരുന്നു.
