ലണ്ടന്‍ : മുന്നില്‍ ദുരന്തം മഞ്ഞുമലയായി പതിയിരിക്കുന്നുണ്ടെന്നറിയാതെ മുന്നേറിയ ആര്‍.എം.എസ് ടൈറ്റാനിക്കിന് ദുരന്ത മുന്നറിയിപ്പ് നല്‍കിയ ‘എസ്.എസ്.മെസബ’ കപ്പലിന്‍റെ അവശിഷ്ടം ഐറിഷ് കടലില്‍ കണ്ടെത്തി. 1912 ഏപ്രിലില്‍ അറ്റ്‌ലാന്റിക് സമുദ്രം കടക്കുകയായിരുന്ന എസ്.എസ്. മെസബ എന്ന വ്യാപാരക്കപ്പല്‍ മുന്നില്‍ മഞ്ഞുമലയുള്ളതായി ടൈറ്റാനിക്കിലേക്ക് വയര്‍ലെസ് സന്ദേശം അയച്ചെങ്കിലും പ്രതികരണമുണ്ടായില്ല. മുങ്ങില്ലെന്ന് കരുതിയ ടൈറ്റാനിക് കപ്പല്‍ കന്നിയാത്രയില്‍ 1912 ഏപ്രില്‍ 14ന് രാത്രി മഞ്ഞുമലയില്‍ ചെന്നിടിക്കുകയും പിറ്റേന്ന് മുങ്ങുകയുമായിരുന്നു.
1918ലെ ഒന്നാം ലോകയുദ്ധത്തില്‍ ടോര്‍പ്പിഡോ ആക്രമണത്തില്‍ മുങ്ങുംവരെ മെസബ വ്യാപാരക്കപ്പലായി തുടര്‍ന്നു. അത്യാധുനിക മള്‍ട്ടിബീം സോണാര്‍ ഉപയോഗിച്ച്‌ ബ്രിട്ടനിലെ ബാംഗോര്‍ യൂനിവേഴ്സിറ്റി ഗവേഷകരാണ് മെസബയുടെ അവശിഷ്ടങ്ങള്‍ തിരിച്ചറിഞ്ഞത്.
