തിരുവനന്തപുരം : ഓഫീസിലെ അതിക്രമങ്ങളെ കുറിച്ച് പരാതിപ്പെടുന്ന വനിതാ ജീവനക്കാരുടെ വിവര ശേഖരണം നടത്തണമെന്നുള്ള ടൂറിസം വകുപ്പ് ഡയറക്ടറുടെ ഉത്തരവ് വകുപ്പ് മന്ത്രി ഇടപെട്ട് റദ്ദാക്കി. മന്ത്രി പി.എ മുഹമ്മദ് റിയാസാണ് ഡയറക്ടര് കൃഷ്ണ തേജയുടെ വിവാദ ഉത്തരവ് റദ്ദാക്കിയത്. ഉത്തരവില് കൃഷ്ണ തേജയില് നിന്ന് മന്ത്രി വിശദീകരണം തേടിയിരുന്നു. ഈ മാസം പതിനേഴിന് കൃഷ്ണ തേജ ഇറക്കിയ ഉത്തരവാണ് വിവാദത്തിലായത്.
അതിക്രമങ്ങളെ കുറിച്ച് പരാതിപ്പെടുന്ന വനിതാ ജീവനക്കാരുടെ വിവരം ശേഖരിക്കാനും തുടര് നടപടി എടുക്കാനുമായിരുന്നു നിര്ദേശം. ടൂറിസം വകുപ്പിലെ വനിതാ ജീവനക്കാര് വകുപ്പിലെ മറ്റ് ഉദ്യോഗസ്ഥര്ക്കെതിരെ നല്കുന്ന പരാതികള് അന്വേഷണ ഘട്ടത്തില് പിന്വലിക്കുന്നുണ്ട്. ആരോപണങ്ങളില് നിന്ന് പിന്വാങ്ങുകയും ചെയ്യുന്നു. ഇത് അന്വേഷണം നടത്തുന്ന ഉദ്യോഗസ്ഥരുടെ സമയവും പ്രയത്നവും നഷ്ടപ്പെടുത്തുന്നു. ചില ജീവനക്കാര് അടിസ്ഥാനഹരിതമായ പരാതികളാണ് ഉന്നയിക്കുന്നത്. ഇത്തരം വ്യാജ പരാതികള് വകുപ്പിന്റെ സല്പ്പേരിന് കളങ്കമുണ്ടാക്കുന്നു. ഈ സാഹചര്യത്തില് ഇത്തരത്തില് പരാതി നല്കുന്നവരുടെ വിവരം പ്രത്യേകം ശേഖരിക്കുകയും തുടര് നടപടി എടുക്കുകയും വേണമെന്നായിരുന്നു ഡയറക്ടറുടെ നിര്ദേശം. ഉത്തരവ് വിവാദമായതോടെയാണ് മന്ത്രി ഇടപെട്ട് റദ്ദാക്കിയത്.
