കോന്നി : നൂലുപോലെ പെയ്യുന്ന മഴയുടെ സൗന്ദര്യം ആവോളം ആസ്വദിച്ചാണ് അടവി കുട്ടവഞ്ചി സവാരി കേന്ദ്രത്തിലെത്തുന്ന വിനോദ സഞ്ചാരികള് മടങ്ങുന്നത്. തിമിര്ത്ത് പെയ്ത മഴ ജില്ലയെ ഭീതിപ്പെടുത്തിയെങ്കിലും ഇപ്പോള് ലഭിക്കുന്ന മഴ വിനോദ സഞ്ചാരികള് ആസ്വദിക്കുകയാണ്. കുട്ടവഞ്ചി കയറുവാന് ചാറ്റല് മഴ ആവേശം പകരുന്നുണ്ട്. മഴ ശക്തിയായി പെയ്തപ്പോള് ചാരി വെച്ചിരുന്ന കുട്ടവഞ്ചികളില് അഭയം തേടിയും സഞ്ചാരികള് നിന്നിരുന്നു.
ദീര്ഘദൂര സവാരിയും ഹ്രസ്വ ദൂരസവാരിയും ഇപ്പോള് നടക്കുന്നുണ്ട്. കുടുംബമായെത്തുന്നവരാണ് അധികവും. അവധി ദിവസങ്ങളില് തിരക്ക് വര്ധിക്കുന്നുണ്ട്. ക്യാമറയില് ചിത്രങ്ങള് പകര്ത്തുവാനെത്തുന്ന വിനോദ സഞ്ചാരികളും അനവധിയാണ്. വനത്തിനുള്ളില് നിന്നും കല്ലാറ്റിലേക്ക് ഒഴുകി എത്തുന്ന തോടുകള്ക്കും മഴയില് പുതുജീവന് ലഭിച്ചിട്ടുണ്ട്. കുട്ടവഞ്ചി കയറുവാന് എത്തുന്നവര്ക്ക് വ്യത്യസ്തമായ അനുഭവം പകരുന്നതാണ് സവാരി കേന്ദ്രത്തിലെ മഴ.
