തിരുവല്ല : പുളിക്കീഴ് ട്രാവന്‍കൂര്‍ ഷുഗേഴ്സ് സ്പിരിറ്റ് മോഷണക്കേസിലെ ഏഴാം പ്രതിക്കായി പോലീസ് കസ്റ്റഡി അപേക്ഷ നല്‍കി. ട്രാവന്‍കൂര്‍ ഷുഗേഴ്സിലേക്ക് ടാങ്കറുകളില്‍ എത്തിച്ച സ്പിരിറ്റ് മറിച്ചു വിറ്റ കേസില്‍ മധ്യപ്രദേശില്‍ പിടിയിലായ സതീഷ് ബാല്‍ ചന്ദ് വാനിയെ കസ്റ്റഡിയില്‍ ലഭിക്കുന്നതിനായി തിരുവല്ല ഒന്നാം ക്ലാസ് ജുഡീഷ്യല്‍ മജിസ്ട്രേറ്റ് കോടതിയിലാണ് പുളിക്കീഴ് പോലീസ് കസ്റ്റഡി അപേക്ഷ നല്‍കിയത്.
അപേക്ഷ കോടതി തിങ്കളാഴ്ച പരിഗണിക്കും. കേസന്വേഷണത്തിന്റെ ഭാഗമായി മധ്യപ്രദേശില്‍ പോയ സി ഐ ബിജു വി.നായരുടെ നേതൃത്വത്തിലുള്ള സംഘം സേന്തൂര്‍ റൂറല്‍ പോലീസിന്റെ കസ്റ്റഡിയിലുള്ള സതീഷ് ബാല്‍ ചന്ദ് വാനിയെ അറസ്റ്റ് ചെയ്ത് ചോദ്യം ചെയ്തിരുന്നു. ഇയാളെ പുളിക്കീഴില്‍ എത്തിച്ച്‌ കൂടുതല്‍ ചോദ്യം ചെയ്യുന്നതിനായാണ് കസ്റ്റഡി അപേക്ഷ നല്‍കിയിരിക്കുന്നതെന്ന് സി ഐ ഇ.ഡി ബിജു പറഞ്ഞു.
കേസില്‍ പിടിയിലായ ഒന്നും രണ്ടും മൂന്നും പ്രതികളായ നന്ദകുമാര്‍ , സിജോ തോമസ്, അരുണ്‍ കുമാര്‍ എന്നിവര്‍ റിമാന്റിലാണ്. കേസിലെ നാലും അഞ്ചും ആറും പ്രതികളായ കമ്പിനി ജനറല്‍ മാനേജര്‍ അലക്സ്‌ പി.ഏബ്രഹാം, പേര്‍സണല്‍ മാനേജര്‍ പി.യു. ഹാഷിം, പ്രൊഡക്ഷന്‍ മാനേജര്‍ മേഘ മുരളി എന്നിവര്‍ ഇപ്പോഴും ഒളിവില്‍ തുടരുകയാണ്.
