പന്തളം : പന്തളം ചന്തയ്ക്കു സമീപമുള്ള വലിയ മാവുകളുടെ ചില്ലകള്‍ കോതിയത് ജനങ്ങള്‍ക്കും യാത്രക്കാര്‍ക്കും ഏറെ ആശ്വാസമായി. ഈ മരത്തില്‍ കൂടുകൂട്ടുന്ന ആയിരക്കണക്കിനു ദേശാടനപ്പക്ഷികളുടെ വിസര്‍ജ്യം മൂലമുള്ള ബുദ്ധിമുട്ടുകള്‍ക്കാണു പരിഹാരമാകുന്നത്. ഈ രണ്ടു മാവുകളുടെയും ശിഖരങ്ങള്‍ കോതിക്കളഞ്ഞു പക്ഷികള്‍ക്കു കൂടുകൂട്ടാന്‍ കഴിയാത്ത വിധം വലയിടാനാണു നഗരസഭ നടപടികള്‍ ആരംഭിച്ചിരിക്കുന്നത്. ഇതിനു മുന്നോടിയായി കഴിഞ്ഞ ദിവസം രാത്രിയില്‍ മരങ്ങളുടെ ശിഖരങ്ങള്‍ വെട്ടിമാറ്റിത്തുടങ്ങി. ഇതു പൂര്‍ത്തി ആയാലുടന്‍ വല കെട്ടുന്ന പ്രവൃത്തി തുടങ്ങും.
പക്ഷിശല്യം ജനങ്ങളെ ഏറെ വര്‍ഷങ്ങളായി കഷ്ടപ്പെടുത്തിക്കൊണ്ടിരിക്കുകയാണ്. ഇതുവഴി പോകുന്ന യാത്രക്കാരുടെ മേല്‍ പക്ഷികള്‍ വിസര്‍ജ്യം കൊണ്ട് അഭിഷേകം നടത്തുന്നതു പതിവായിരുന്നു. കാഷ്ടം വീണ് അത്യാവശ്യ യാത്രകള്‍ മുടങ്ങുന്നതോടൊപ്പം പലവിധ ത്വഗ്‌രോഗങ്ങളും ഉണ്ടാകുന്ന സംഭവങ്ങളും പതിവായിരുന്നു. മരത്തിലെ കൂടുകളില്‍ നിന്നു താഴെ വീഴുന്ന പക്ഷിക്കുഞ്ഞുങ്ങള്‍ ചത്തഴുകുന്നതും പലവിധ ആരോഗ്യപ്രശ്‌നങ്ങളും ഉണ്ടാക്കിയിരുന്നു.
ഈ പ്രശ്‌നം പരിഹരിക്കണമെന്നാവശ്യപ്പെട്ടു നാട്ടുകാരും വര്‍ഷങ്ങളായി പല അധികാരികള്‍ക്കും മുന്നിലെത്തി. ഇതോടെ ജനങ്ങള്‍ക്കു ഭീഷണിയായി നില്ക്കുന്ന മരങ്ങള്‍ വെട്ടിമാറ്റാന്‍ ബന്ധപ്പെട്ടവര്‍ തീരുമാനവുമെടുത്തതാണ്. എന്നാല്‍ ചില പക്ഷിസ്‌നേഹികള്‍ ഇതിനെതിരെ രംഗത്തെത്തിയതോടെ ഈ നീക്കം ഉപേക്ഷിച്ചു. എന്നാല്‍ നാട്ടുകാരുടെ എതിര്‍പ്പും സമരങ്ങളും ശക്തമായതോടെ മരത്തിന്റെ ശിഖരങ്ങള്‍ വെട്ടി പക്ഷികള്‍ കൂടുകൂട്ടാത്ത വിധത്തില്‍ വലകെട്ടാന്‍ തീരുമാനം എടുക്കുകയായിരുന്നു.
