വാഷിംഗ്ടണ്‍: അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ ഉന്നത ഉപദേഷ്ടാവിന് കോവിഡ് സ്ഥിരീകരിച്ചതായി അടുത്ത വൃത്തങ്ങള്‍ അറിയിച്ചു. ട്രംപിന്റെ ഉന്നത ഉപദേഷ്ടാവായ ഹോപ് ഹിക്‌സിനാണ് കോവിഡ് സ്ഥിരീകരിച്ചത്.
ഹിക്‌സ് പ്രസിഡന്റിനൊപ്പം എയര്‍ഫോഴ്‌സ് വണ്ണില്‍ പതിവായി യാത്ര ചെയ്യുകയും അദ്ദേഹത്തോടൊപ്പം ക്ലീവ്ലാന്‍ഡിലേക്ക് ഈ ആഴ്ച ആദ്യം പ്രസിഡന്റ് ചര്‍ച്ചയ്ക്കായി മറ്റ് മുതിര്‍ന്ന സഹായികള്‍ക്കൊപ്പം പോകുകയും ചെയ്തിരുന്നു.
തന്നെയും അമേരിക്കന്‍ ജനതയെയും പിന്തുണയ്ക്കുന്ന എല്ലാവരുടെയും ആരോഗ്യവും സുരക്ഷയും വളരെ ഗൗരവമായി കാണുന്നു എന്നും കോവിഡ് വ്യാപനം പരമാവധി പരിമിതപ്പെടുത്തുന്നതിനുള്ള മാര്‍ഗ്ഗനിര്‍ദ്ദേശങ്ങള്‍ പാലിച്ചിട്ടുണ്ടെന്നും ട്രംപ് പറഞ്ഞതായി വൈറ്റ് ഹൗസ് പ്രസ്താവനയില്‍ പറഞ്ഞു.
ഹിക്‌സിന് കോവിഡാണെന്ന് ബ്ലൂംബര്‍ഗ് ന്യൂസ് ആണ് ആദ്യം റിപ്പോര്‍ട്ട് ചെയ്തത്. മുമ്പ് വൈറ്റ് ഹൗസ് കമ്മ്യൂണിക്കേഷന്‍സ് ഡയറക്ടറായും ട്രംപിന്റെ 2016 ലെ പ്രസിഡന്റ് തെരഞ്ഞെടുപ്പ് പ്രചാരണത്തിന്റെ വക്താവായും ഹിക്‌സ് പ്രവര്‍ത്തിച്ചിട്ടുണ്ട്.
