വാഷിങ്ടണ്‍ : അമേരിക്കയിലെ ഇടക്കാല തെരഞ്ഞെടുപ്പ് കഴിഞ്ഞാല്‍ ഇറാനെതിരെ ആക്രമണങ്ങളുണ്ടാകുമെന്ന് യുഎസ് പ്രസിഡന്റ് ഡോണള്‍ഡ് ട്രംപിന്റെ ഭീഷണി. ആണവായുധം സ്വന്തമാക്കില്ലെന്ന് ഉറപ്പ് നല്‍കിയെങ്കിലും ഇറാന്റെ പരിഹാര നിര്‍ദേശം ഒട്ടും സ്വീകാര്യമല്ലെന്നും ട്രംപ് പറഞ്ഞു. മേഖലയില്‍ അമേരിക്കന്‍ സൈനിക വിന്യാസം കൂട്ടാന്‍ പെന്റഗണ്‍ പദ്ധതിയിടുന്നതായും റിപ്പോര്‍ട്ടുകളുണ്ട്. യുഎസ്എസ് തിയോഡോര്‍ റൂസ്‌വെൽറ്റ് വിമാനവാഹിനി കപ്പലും സൈനിക വിഭാഗവും സാന്‍ ഡിയാഗോയില്‍ നിന്ന് മിഡില്‍ ഈസ്റ്റിലേക്ക് പുറപ്പെട്ടതായാണ് വിവരം.
എന്നാല്‍ നയതന്ത്ര പ്രശ്‌നപരിഹാര നീക്കങ്ങളോട് ഇറാന്‍ ഒരിക്കലും മുഖം തിരിച്ചിട്ടില്ലെന്നും ഏത് ഘട്ടത്തിലും ചര്‍ച്ചയ്ക്ക് തയ്യാറാണെന്നും ഇറാന്‍ പ്രസിഡന്റ് മസൂദ് പെസഷ്‌കിയാന്‍ പ്രതികരിച്ചു. അതേസമയം ഇറാന്‍ മുന്നോട്ടുവെച്ച ഏഴുദിന വെടിനിര്‍ത്തല്‍ നിര്‍ദേശം ട്രംപ് ഔദ്യോഗികമായി തള്ളിയെങ്കിലും അതിന് രേഖാമൂലമുള്ള മറുപടി മധ്യസ്ഥ രാജ്യങ്ങള്‍ ഇനിയും നല്‍കിയിട്ടില്ല. കഴിഞ്ഞ ദിവസം, ഇറാനെതിരായ യുദ്ധം ഉടന്‍ ജയിക്കുമെന്നും അതോടെ എണ്ണവില കുറയുമെന്നും ട്രംപ് പറഞ്ഞിരുന്നു.
ഇറാനെതിരായ ഉപരോധ നടപടികള്‍ വലിയ വിജയം കണ്ടെന്നും ഹോര്‍മുസ് വഴി കൂടുതല്‍ എണ്ണ എത്തിക്കാന്‍ സാധിച്ചതോടെ ഇറാന്റെ ദൗര്‍ബല്യം തുറന്നുകാട്ടപ്പെട്ടുവെന്നുമാണ് അമേരിക്കന്‍ ഔദ്യോഗിക പക്ഷത്തിന്റെ വാദം.
