കോലഞ്ചേരി : ഗ്രാമപഞ്ചായത്തുകള്‍ക്ക് പിന്നാലെ വടവുകോട് ബ്ലോക്ക് പഞ്ചായത്തും ട്വന്റി-20 പിടിച്ചെടുത്തു. വടവുകോട് ബ്ലോക്ക് പഞ്ചായത്ത് പ്രസിഡന്റ് സ്ഥാനമാണ് ട്വന്റി-20 പിടിച്ചെടുത്തത്. ട്വന്റി-20 യുടെ റസീന പരീതിനെ ബ്ലോക്ക് പഞ്ചായത്ത് പ്രസിഡന്റായി തെരഞ്ഞെടുത്തു. ഇന്ന് രാവിലെ 11 മണിയോടെയാണ് തെരഞ്ഞെടുപ്പ് നടന്നത്. റസീന പരീത് 5 വോട്ടുകള്‍ നേടിയപ്പോള്‍ എതിരായി മത്സരിച്ച യു.ഡി.എഫ് സ്ഥാനാര്‍ത്ഥി അനു അച്ചുവിന് 4 വോട്ടും എല്‍.ഡി.എഫ് സ്ഥാനാര്‍ത്ഥി ജൂബിള്‍ ജോര്‍ജിന് 3 വോട്ടും ലഭിച്ചു. കോണ്‍ഗ്രസിലെ വി.ആര്‍ അശോകനായിരുന്നു നേരത്തെ പ്രസിഡന്റ്. ഇദ്ദേഹം മരണപ്പെട്ടതിനെ തുടര്‍ന്നാണ് പ്രസിഡന്റ് സ്ഥാനത്തേക്ക് തെരഞ്ഞെടുപ്പ് നടന്നത്. കുന്നത്തുനാട് നിയോജക മണ്ഡലത്തിലെ നാല് ഗ്രാമപഞ്ചായത്തുകളുടെ ഭരണവും ട്വന്റി-20 ക്കാണ്. വടവുകോട് ബ്ലോക്കിലെ വെമ്പിള്ളി ഡിവിഷന്‍ അംഗമാണ് റസീന.
