പത്തനംതിട്ട : സാമൂഹികപ്രവർത്തക ഡോ.എം. എസ്. സുനിൽ ഭവനരഹിതരായി സുരക്ഷിതമല്ലാത്ത കുടിലുകളിൽ കഴിയുന്ന നിരാശ്രയർക്ക് പണിതു നൽകുന്ന 248 -മത് സ്നേഹഭവനം ഫ്ലോറിഡയിൽ ജോലിയുള്ള തോമസിന്റെ സഹായത്താൽ കവിയൂർ കോട്ടൂർ പനങ്ങായിൽ സുജ ബിനോയിക്കും കുടുംബത്തിനുമായി നിർമ്മിച്ചു നൽകി. വീടിന്റെ താക്കോൽ ദാനവും ഉദ്ഘാടനവും ചലച്ചിത്ര സംവിധായകനും സ്ക്രിപ്റ്റ് റൈറ്ററുമായ പ്രൊഫ.കവിയൂർ ശിവപ്രസാദ് നിർവഹിച്ചു.
വർഷങ്ങളായി സ്വന്തമായി വീടില്ലാത്ത അവസ്ഥയിൽ അടച്ചുറപ്പില്ലാത്ത ഒരു ചെറിയ കുടിലിലായിരുന്നു സുജ ബിനോയിയും 2 പെൺകുഞ്ഞുങ്ങളും താമസിച്ചിരുന്നത്. പെൺകുട്ടികളുടെ വിദ്യാഭ്യാസത്തിനും വീട്ടു ചിലവിനുമായി ഏറെ ബുദ്ധിമുട്ടിയിരുന്ന കുടുംബം സ്വന്തമായ ഒരു വീടിനു വേണ്ടി മുട്ടാത്ത വാതിലുകളില്ല. ഇവരുടെ ദയനീയാവസ്ഥ മനസ്സിലാക്കിയ ടീച്ചർ ഇവർക്കായി രണ്ടു മുറികളും അടുക്കളയും ഹാളും ശുചിമുറിയും സിറ്റൗട്ടും അടങ്ങിയ ഒരു വീട് പണിത് നൽകുകയായിരുന്നു. ചടങ്ങിൽ പ്രോജക്ട് മാനേജർ കെ.പി. ജയലാൽ., ആനന്ദൻ. കെ., സുമ സുരേഷ്., സുനിത അഭിലാഷ് എന്നിവർ പ്രസംഗിച്ചു.