കോന്നി : തിരഞ്ഞെടുപ്പ് വിജയാഹ്ലാദത്തിന് ഇടയിൽ അരുവാപ്പുലം ഗ്രാമ പഞ്ചായത്തിൽ യു ഡി എഫ് പ്രവർത്തകർ സി പി ഐ(എം) പ്രവർത്തകന്റെ വീടിന് നേരെ പടക്കം എറിഞ്ഞതായി ആരോപണം. ഐരവൺ മാളാപാറ മനോവിലാസത്തിൽ പ്രഭാകരന്റെ വീടിന് നേരെയാണ് യു ഡി എഫ് വിജയാഘോഷം നടക്കുന്നതിന് ഇടയിൽ പടക്കം എറിഞ്ഞത്. വൈകിട്ട് മൂന്ന് മണിയോടെ ആണ് സംഭവം.
അരുവാപ്പുലം പഞ്ചായത്തിൽ ജയിച്ച യു ഡി എഫ് സ്ഥാനാർഥി മിനി വിനോദിന്റെ ആഹ്ലാദപ്രകടനം വീടിന് മുൻപിൽ എത്തിയപ്പോൾ ആണ് പ്രവർത്തകർ വീട്ടിലേക്ക് പടക്കം എറിഞ്ഞത്. പ്രഭാകരനും ഭാര്യയും ഈ സമയം വീടിനുള്ളിൽ ഉണ്ടായിരുന്നു. വാഹനത്തിൽ എത്തിയ യു ഡി എഫ് പ്രവർത്തകർ വീട്ടിലേക്ക് വാഹനത്തിൽ നിന്ന് പടക്കം എറിയുകയായിരുന്നു എന്നും പ്രഭാകരൻ പറയുന്നു. സ്ഫോടനത്തിന്റെ ശക്തിയിൽ വീടിനുള്ളിൽ പുകകൊണ്ട് നിറയുകയും ചെയ്തു. സ്ഥാനാർഥിയും മക്കളും അടക്കം വാഹനത്തിൽ ഉണ്ടായിരുന്നു എന്നും വീട്ടുകാർ പറയുന്നു.
