ന്യൂഡല്‍ഹി: ജനിതക മാറ്റം സംഭവിച്ച കൊറോണ വൈറസ് പടര്‍ന്നതിനെ തുടര്‍ന്ന് നിര്‍ത്തലാക്കിയ ഇന്ത്യ -യു.കെ വ്യോമഗതാഗതം പുനരാരംഭിക്കുന്നതിന്‍റെ ഭാഗമായി എയര്‍ ഇന്ത്യ ബുക്കിങ് ആരംഭിച്ചു. എയര്‍ ഇന്ത്യ വെബ്സൈറ്റ്, ബുക്കിങ് ഓഫിസുകള്‍, കോള്‍ സെന്‍റര്‍, അംഗീകൃത യാത്ര ഏജന്‍സികള്‍ മുഖേന വിമാനടിക്കറ്റുകള്‍ ബുക്ക് ചെയ്യാം.
ഇന്ത്യ -യു.കെ എയര്‍ ഇന്ത്യ വിമാനടിക്കറ്റുകളുടെ ബുക്കിങ് ആരംഭിച്ചുവെന്ന് വിമാനകമ്പനി ട്വിറ്ററിലൂടെ അറിയിക്കുകയായിരുന്നു. മുംബൈ -ലണ്ടന്‍ ഹെത്രോ വിമാനത്താവളം, ഡല്‍ഹി -ലണ്ടന്‍ ഹെത്രോ, ലണ്ടന്‍ ഹെത്രോ -മുംബൈ, ലണ്ടന്‍ ഹെത്രോ -ഡല്‍ഹി എന്നിവയാണ് ആദ്യഘട്ടത്തില്‍ സര്‍വിസ് നടത്തുക. സാധാരണ വിമാനസര്‍വിസുകള്‍ക്ക് പുറമെയാണ് ഈ സര്‍വിസുകള്‍.
ജനിതകമാറ്റം സംഭവിച്ച കൊറോണ വൈറസ് സ്ഥിരീകരിച്ചതിനെ തുടര്‍ന്ന് നിര്‍ത്തലാക്കിയ ഇന്ത്യ -യു.കെ വ്യോമഗതാഗതം ജനുവരി ആറുമുതല്‍ ഇന്ത്യയില്‍നിന്ന് യു.കെയിലേക്കും എട്ടുമുതല്‍ തിരിച്ചും സര്‍വിസുകള്‍ ആരംഭിക്കുമെന്ന് കേന്ദ്ര വ്യോമയാന മന്ത്രി ഹര്‍ദീപ് സിങ് പുരി അറിയിച്ചിരുന്നു. ജനുവരി
23 വരെ ആഴ്ചയില്‍ 15 വിമാനങ്ങള്‍ മാത്രമേ സര്‍വിസ് നടത്തൂ. ഡിസംബര്‍ 23ന് യാത്ര ചെയ്യാനായി ബുക്ക് ചെയ്ത യാത്രക്കാരാണ് യു.കെയില്‍നിന്ന് ആദ്യംപുറപ്പെടുന്നതെന്ന് എയര്‍ ഇന്ത്യ അറിയിച്ചു.
