കോന്നി : അരുവാപ്പുലം രാധപ്പടി – പുളിഞ്ചാണി റോഡില് സ്ലാബ് സ്ഥാപിക്കാത്ത ഓടകള് യാത്രക്കാര്ക്ക് ഭീഷണിയാകുന്നു. പടപ്പയ്ക്കല് കുരിശടിയുടെ എതിര്വശത്താണ് ഓട മൂടിയില്ലാതെ നിര്മ്മിച്ചിരിക്കുന്നത്. സ്കൂള് കുട്ടികള് ഉള്പ്പെടെ ഈ വഴിയാണ് നടന്നു പോകുന്നത് എന്നതിനാല് തന്നെ വലിയ അപകട ഭീഷണിയാണ് ഇത് ഉയര്ത്തുന്നത്. കുട്ടികള് ഉള്പ്പെടെയുള്ള യാത്രക്കാര് ബസ് കാത്ത് നില്ക്കുന്ന കേന്ദ്രം കൂടിയാണ് ഇവിടം. ഓടയുടെ മുകളില് കാട് കയറി കിടക്കുന്നതിനാല് ഇത് ആരുടേയും ശ്രദ്ധയില് പെടുകയുമില്ല. ഇത് അപകട സാധ്യത വര്ധിപ്പിക്കുന്നു. മഴക്കാലത്താണ് ഇത് ഏറ്റവും ബുദ്ധിമുട്ട് സൃഷ്ടിക്കുന്നത്.
റോഡിലൂടെ പോകുന്ന വാഹനങ്ങള് രാത്രി സമയങ്ങളില് ഇതിനുള്ളില് വീണ് അപകടം സംഭവിക്കുന്നതിനും സാധ്യത കൂടുതല് ആണ്. നാട്ടുകാര് നിരവധി തവണ പരാതി പറഞ്ഞിട്ടും യാതൊരു പ്രയോജനവും ഉണ്ടായില്ല. കൊല്ലന്പടി ജംഗ്ഷനിലും ഇതാണ് അവസ്ഥ. ഇവിടെ ഓടയില് കാല് വഴുതി വീണ് നിരവധി ആളുകള്ക്ക് പരിക്ക് സംഭവിച്ചിരുന്നു.
