ഇസ്ലാമാബാദ്: കൊറോണ വൈറസിനെതിരായ പോരാട്ടത്തിനായി പാകിസ്താന് 8.4 ദശലക്ഷം ഡോളര് സഹായം പ്രഖ്യാപിച്ച് അമേരിക്ക. പാകിസ്താനിലെ അമേരിക്കന് അംബാസഡര് പോള് ജോണ്സാണ് ഇക്കാര്യം അറിയിച്ചത്. അമേരിക്ക എട്ട് ദശലക്ഷം ഡോളറിലധികം സംഭാവന നല്കികൊണ്ട് രാജ്യവ്യാപകമായി കോവിഡ് വൈറസ് വ്യാപിക്കുന്നത് തടയുന്നതിനും ദുരിതബാധിതരായ ആളുകളെ പരിചരിക്കുന്നതിനും പാകിസ്താന് സര്ക്കാരുമായി സഹകരിക്കുന്നുവെന്ന് പോള് ജോണ്സ് വിഡിയോ സന്ദേശത്തിലൂടെ അറിയിച്ചു. പാകിസ്താന് അധികൃതര് മുന്ഗണനാ ആവശ്യങ്ങള്ക്കായി ഈ സംഭാവന ചെലവഴിക്കുമെന്നും അത് പൂര്ണമായും നല്കുന്നത് അമേരിക്കന് ജനതയാണെന്നും അദ്ദേഹം പറഞ്ഞു.
പാകിസ്താനിലെ കോവിഡ് വൈറസ് ഹോട്ട് സ്പോട്ടുകളില് മൂന്ന് പുതിയ മൊബൈല് ലാബുകള് ആരംഭിക്കുന്നതിന് മൊത്തം തുകയില് നിന്ന് ഏകദേശം മൂന്ന് ദശലക്ഷം യു.എസ് ഡോളര് ഉപയോഗിക്കും. ഇത് കൂടുതല് കോവിഡ് പരിശോധനക്കും നിരീക്ഷണത്തിനും സഹായിക്കും. ആരോഗ്യപ്രവര്ത്തകര്ക്ക് പരിശീലനം നല്കുന്നതിനും അതിലൂടെ ആശുപത്രികളുടെ ഭാരം കുറക്കുന്നതിനും സംഭാവന ഉപയോഗപ്പെടുത്തും.
പാകിസ്താനില് ഇതുവരെ 7476 കോവിഡ് വൈറസ് കേസുകള് റിപ്പോര്ട്ട് ചെയ്തിട്ടുണ്ട്. രാജ്യത്ത് 143 പേര് ആണ് കോവിഡ് ബാധിച്ച് മരിച്ചത്. പാകിസ്താന് കോവിഡ് പ്രതിരോധത്തിന് അന്തരാഷ്ട്ര നാണ്യനിധിയില് നിന്നും 1.3 ബില്ല്യണ് അടിയന്തര ധനസഹായമായി അനുവദിച്ചിരുന്നു
