ഡല്ഹി: പൊതു അവധി ദിവസങ്ങള് ഉള്പ്പെടെ ഈ മാസം എല്ലാ ദിവസവും വാക്സിന് നല്കാന് ആശുപത്രികള്ക്കു കേന്ദ്ര സര്ക്കാര് നിര്ദേശം. പൊതു, സ്വകാര്യ വാക്സിനേഷന് കേന്ദ്രങ്ങള് അവധി ദിവസങ്ങള് കണക്കിലെടുക്കാതെ പ്രവര്ത്തിക്കണമെന്ന് സര്ക്കാര് നിര്ദേശം നല്കി. വാക്സിനേഷന് മൂന്നാം ഘട്ടത്തോട് അനുബന്ധിച്ചാണ് കേന്ദ്രത്തിന്റെ പുതിയ നിര്ദേശം.
ഓണ്ലൈന് മുഖേനയും ആശുപത്രിയില് നേരിട്ടെത്തി റജിസ്റ്റര് ചെയ്തും വാക്സീന് സ്വീകരിക്കാം. www.cowin.gov.in എന്ന വെബ് സൈറ്റില് റജിസ്റ്റര് ചെയ്യാം. തിരക്ക് ഒഴിവാക്കാന് ഓണ്ലൈന് രജിസ്റ്റര് ചെയ്ത് വാക്സീനെടുക്കാന് എത്തുന്നതാണ് നല്ലതെന്ന് സംസ്ഥാന ആരോഗ്യവകുപ്പ് അറിയിച്ചു. ഓണ്ലൈന് രജിസ്ട്രേഷനിലൂടെ ഇഷ്ടമുള്ള ആശുപത്രിയും ദിവസവും തെരഞ്ഞെടുക്കാം.
45 ദിവസം കൊണ്ട് 45 വയസിന് മേല് പ്രായമുള്ളവര്ക്ക് വാക്സിനേഷന് പൂര്ത്തിയാക്കാനാണ് സംസ്ഥാനത്ത് ലക്ഷ്യമിടുന്നത്. വാക്സീന് നല്കുന്നതിനായി വരും ദിവസങ്ങളില് വാക്സിനേഷന് കേന്ദ്രങ്ങളുടെ എണ്ണം വര്ധിപ്പിക്കും. കൂടുതല് വാക്സീനുകള് സംസ്ഥാനത്ത് എത്തിക്കുമെന്ന് കേന്ദ്ര ആരോഗ്യ മന്ത്രാലയം അറിയിച്ചു.
