കൊട്ടാരക്കര: തലച്ചിറയില്‍ വീട് തീവെച്ച്‌ നശിപ്പിക്കാന്‍ ശ്രമിച്ച കേസിലെ പ്രതിയെ കൊട്ടാരക്കര പോലീസ് പിടികൂടി. കുന്നിക്കോട് പനമ്പറ്റ ആവണീശ്വരം വൈദ്യഗിരി എസ്റ്റേറ്റില്‍ ലൈജു മാത്യു (41) ആണ് പിടിയിലായത്. തലച്ചിറ കൃപാലയത്തില്‍ ജോസ് മാത്യുവിന്റെ വീടാണ് 13ന് രാത്രി പത്തോടെ പെട്രോള്‍ ഉപയോഗിച്ച്‌ കത്തിച്ച്‌ നശിപ്പിക്കാന്‍ ശ്രമിച്ചത്.
സംഭവം നടന്നതിന്റെ പിറ്റേന്നുതന്നെ പ്രതിയെ പിടികൂടിയെങ്കിലും കുറ്റം സമ്മതിച്ചില്ല. ജില്ല പോലീസ് മേധാവി ഹരിശങ്കറിെന്‍റ നിര്‍ദേശാനുസരണം പോലീസ് കൂടുതല്‍ ശാസ്ത്രീയ തെളിവുകള്‍ കണ്ടെത്തി നടത്തിയ അന്വേഷണത്തിനൊടുവില്‍ പ്രതി കുറ്റം സമ്മതിക്കുകയായിരുന്നു.
വാദിയും പ്രതിയും തമ്മിലുണ്ടായിരുന്ന ബിസിനസ്പരമായ തര്‍ക്കമാണ് അക്രമത്തിന് പ്രേരിപ്പിച്ചതെന്ന് പ്രതി സമ്മതിച്ചു. കൊട്ടാരക്കര പോലീസ് ഇന്‍സ്പെക്ടര്‍ ജോസഫ് ലിയോണിന്റെ നേതൃത്വത്തില്‍ പ്രൊബേഷന്‍ എസ്.ഐ പ്രശാന്ത്. സി.പി.ഒ സലില്‍ എന്നിവരടങ്ങിയ സംഘമാണ് പ്രതിയെ പിടികൂടിയത്.
