കോഴിക്കോട്: വെള്ളിമാടുകുന്ന് എച്ച് എം ഡി സി യില്‍ ആറു വയസുകാരന്‍ മരിച്ച നിലയില്‍. ചേവായൂര്‍ പോലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചു. വകുപ്പ് തല അന്വേഷണം ആരംഭിച്ചതായി ജില്ലാ സാമൂഹിക നീതി വകുപ്പും അറിയിച്ചു. ഇന്ന് രാവിലെ ആറരയ്ക്കാണ് സാമൂഹ്യ നീതി വകുപ്പിന് കീഴിലുള്ള വെള്ളിമാടുകുന്ന് എച്ച് എം ഡി സി യിലെ കിടപ്പു മുറിയില്‍ ആറു വയസുകാരനെ മരിച്ച നിലയില്‍ കണ്ടെത്തിയത്. മാനസിക വൈകല്യമുള്ള 15 വയസില്‍ താഴെയുള്ള കുട്ടികളെ താമസിപ്പിക്കുന്ന സ്ഥാപനമാണിത്.
വയനാട് കൈതപോയില്‍ സ്വദേശിയായ കുട്ടിയാണ് മരിച്ചത്. മരണത്തില്‍ ദുരൂഹതയുണ്ടെന്നും കൊലപാതകമാണോ എന്ന് സംശയമുള്ളതായും സാമൂഹ്യനീതി വകുപ്പ് ജില്ലാ ഓഫീസര്‍ പ്രതികരിച്ചു. 38 കുട്ടികളാണ് സ്ഥാപനത്തില്‍ ആകെ ഉള്ളത്. 6 കുട്ടികള്‍ മരിച്ച കുട്ടിക്കൊപ്പം മുറിയിലുണ്ടായിരുന്നു. പോസ്റ്റ്മാര്‍ട്ടം റിപ്പോര്‍ട്ട് ലഭിച്ചതിനു ശേഷമേ മരണ കാരണം വ്യക്തമാവുകയുള്ളു എന്ന് ജില്ലാ ശിശു ക്ഷേമ സമിതി ചെയര്‍പേഴ്‌സന്‍ പറഞ്ഞു.
