വെഞ്ഞാറമൂട് : വൃദ്ധ ദമ്പതികളെ വിഷം ഉള്ളില്‍ച്ചെന്ന് അവശനിലയില്‍ക്കണ്ട സംഭവവുമായി ബന്ധപ്പെട്ട് ഒരാള്‍ അറസ്റ്റില്‍. വെള്ളുമണ്ണടി ബാലന്‍പച്ച പുലയരുകുന്ന് വീട്ടില്‍ ബിജുവിനെയാണ്(42) വെഞ്ഞാറമൂട് പോലീസ് അറസ്റ്റ് ചെയ്തത്. പുലയരുകുന്നില്‍ വീട്ടില്‍ വാസുദേവന്‍ (80), ഭാര്യ സരസ്വതിയമ്മ (75)എന്നിവരെയാണ് ഞായറാഴ്ച വിഷം ഉള്ളില്‍ ചെന്ന നിലയില്‍ വീട്ടില്‍ കണ്ടെത്തിയത്. അറസ്റ്റിലായ ബിജു ആ ദിവസം ദമ്പതികളെ പരസ്യമായി മര്‍ദ്ദിച്ചിരുന്നു. വസ്തു സംബന്ധമായ തര്‍ക്കമായിരുന്നു പ്രകോപനം.
ഇതില്‍ മനം നൊന്താണ് രാത്രിയില്‍ ഇരുവരും ആത്മഹത്യക്ക് ശ്രമിച്ചതെന്ന് കാണിച്ച്‌ ബന്ധു നല്കിയ പരാതിയുടെ അടിസ്ഥാനത്തിലായിരുന്നു അറസ്റ്റ്. തിരുവനന്തപുരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ച ദമ്പതികള്‍ അപകടനില തരണം ചെയ്തിട്ടില്ല. വെഞ്ഞാറമൂട് സി. ഐ വിജയരാഘവന്റെ നേതൃത്വത്തില്‍ എസ്.ഐ ശ്രീകുമാര്‍, സീനിയര്‍ സിവില്‍ പോലീസ് ഓഫീസര്‍ ഷൈജു ബി എന്നിവരടങ്ങുന്ന സംഘമാണ് പ്രതിയെ അറസ്റ്റ് ചെയ്തത്. ആത്മഹത്യ പ്രേരണാക്കുറ്റമാണ് ചുമത്തിയിരിക്കുന്നത്. പ്രതിയെ റിമാന്‍ഡു ചെയ്തു.
