മുംബൈ : ബോളിവുഡ് താരദമ്ബതിമാരായ വിക്കി കൗശലിനും കത്രീന കൈഫിനും വധഭീഷണി. സാമൂഹ്യ മാധ്യമങ്ങള്‍ വഴിയാണ് അജ്ഞാതന്‍ വധഭീഷണി മുഴക്കിയത്.വിക്കി കൗശൽ നൽകിയ പരാതിയിൽ ഐടി ആക്ട് പ്രകാരം മുംബൈ സാന്താക്രൂസ് പോലീസ് കേസ് രജിസ്റ്റർ ചെയ്തു. ഇന്‍സ്റ്റഗ്രാമിലൂടെ ഭീഷണി മെസേജുകള്‍ ഒരുപോലെ തനിക്കും ഭാര്യയ്ക്കും അയച്ചു എന്നാണ് വിക്കി പരാതിയില്‍ പറയുന്നത്. ഐടി ആക്ട് (സെക്ഷന്‍ 506 (2), 354 (ഡി), ഐപിസി 67) പ്രകാരമാണ് കേസ് രജിസ്റ്റര്‍ ചെയ്തിരിക്കുന്നത്. കത്രീനയെ ഇയാള്‍ നിരന്തരം പിന്‍തുടരുന്നതായും ഭീഷണി സന്ദേശങ്ങള്‍ അയക്കുന്നതായും പോലീസ് പറഞ്ഞു. സംഭവത്തില്‍ ഇതുവരെ അറസ്റ്റ് ഒന്നും ഉണ്ടായിട്ടില്ലെന്നും പോലീസ് അറിയിച്ചു.
കുറച്ചുനാളുകൾക്ക് മുൻപ് ബോളിവുഡ് താരങ്ങളായ സൽമാൻ ഖാൻ,സ്വര ഭാസ്‌കർ എന്നിവർക്കും അജ്ഞാതരുടെ വധഭീഷണി ഉണ്ടായിരുന്നു. പഞ്ചാബി ഗായകൻ സിദ്ദു മൂസേവാലയുടെ മരണശേഷമാണ് സൽമാന് വധഭീഷണി ഉണ്ടായത്.
