കൊച്ചി : യുവനടിയെ പീഡിപ്പിച്ച കേസില് നിര്മ്മാതാവും നടനുമായ വിജയ് ബാബു അറസ്റ്റില്. അന്വേഷണ സംഘത്തിന് മുന്നില് വിജയ് ബാബു ചോദ്യം ചെയ്യലിന് ഹാജരായിരുന്നു. ഇതിനു ശേഷമാണ് അറസ്റ്റ് രേഖപ്പെടുത്തിയത്. ഇന്നു തന്നെ ഇയാളെ തെളിവെടുപ്പിനായി കൊണ്ടുപോകും. പനമ്പിള്ളി നഗറിലെ ഡി ഹോംസിലാണ് തെളിവെടുപ്പ്.
എറണാകുളം സൗത്ത് പോലീസ് സ്റ്റേഷനിലാണ് വിജയ് ബാബു ചോദ്യം ചെയ്യലിനായി ഹാജരായത്. ഇന്ന് മുതല് ജൂലൈ 3 വരെ, രാവിലെ 9 മുതല് വൈകിട്ട് ആറ് മണി വരെയാണ് ചോദ്യം ചെയ്യാന് അന്വേഷണ സംഘത്തിന് അനുമതി ലഭിച്ചിരുന്നു. അന്വേഷണ സംഘത്തിന് ആവശ്യമെങ്കില് വിജയ് ബാബുവിനെ അറസ്റ്റു ചെയ്യാനും അഞ്ചുലക്ഷം രൂപയുടെയും രണ്ട് ആള്ജാമ്യത്തിന്റെയും പിന്ബലത്തില് ജാമ്യം അനുവദിക്കാനും കോടതി ഉത്തരവുണ്ട്.
കഴിഞ്ഞ ഏപ്രില് 22 നാണ് സിനിമയില് അവസരം നല്കാമെന്നു പറഞ്ഞു പ്രലോഭിപ്പിച്ചു ലൈംഗികമായി വിജയ് ബാബു പീഡിപ്പിച്ചെന്ന പരാതിയുമായി യുവതി പോലീസിനെ സമീപിച്ചത്. പരാതി വിവരം അറിഞ്ഞതിനു പിന്നാലെ രാജ്യംവിട്ട വിജയ് ബാബുവിനായി പോലീസ് ലുക്കൗട്ട് നോട്ടീസ് പുറപ്പെടുവിക്കുകയും പാസ്പോര്ട് റദ്ദാക്കുകയും ചെയ്തിരുന്നു. ഹൈക്കോടതി ഇടപെടലിലാണ് വിജയ് ബാബു നാട്ടിലെത്തി മുന്കൂര് ജാമ്യം നേടിയത്
