ന്യൂഡൽഹി: എ.ഐ.എ.ഡി.എം.കെയിൽ നിന്ന് പുറത്താക്കപ്പെട്ട തമിഴ്‌നാട്ടിൽ നിന്നുള്ള രാജ്യസഭാ എംപി ശശികല പുഷ്പ ഞായറാഴ്ച ബിജെപിയിൽ ചേർന്നു. പാർട്ടിയുടെ ദേശീയ സെക്രട്ടറി പി മുരളീധർ റാവു, മുൻ കേന്ദ്രമന്ത്രി പൊന്‍ രാധാകൃഷ്ണൻ എന്നിവരുടെ സാന്നിധ്യത്തിലായിരുന്നു ശശികലയുടെ ബി.ജെ.പി പ്രവേശനം .
തെക്കന്‍ തമിഴ്നാട്ടില്‍ നിന്നുള്ള നേതാവായ ശശികല തുറമുഖ പട്ടണമായ തൂത്തുക്കുടിയിലെ പ്രധാനിയും എ.ഐ.എ.ഡി.എം.കെയുടെ വനിതാ വിഭാഗത്തിന്റെ അധ്യക്ഷയായും പ്രവർത്തിച്ചിട്ടുണ്ട്. രാജ്യസഭാ എം.പിയായുള്ള ശശികലയുടെ കാലാവധി ഏതാനും മാസങ്ങള്‍ക്കുള്ളില്‍ അവസാനിക്കും. 2016 ൽ ഡിഎംകെ എംപിയുമായി വാക്കേറ്റത്തിനിടെ അയാളെ ശശികല മര്‍ദ്ദിച്ചതായി ആരോപണമുയര്‍ന്നിരുന്നു. തുടർന്ന് അന്നത്തെ എ.ഐ.എ.ഡി.എം.കെ പരമോന്നതയും മുൻ തമിഴ്‌നാട് മുഖ്യമന്ത്രിയുമായ ജെ.ജയലളിത പാർട്ടിയിൽ നിന്ന് പുറത്താക്കുകയായിരുന്നു.
