ചെങ്ങന്നൂര്‍ : ഇരമല്ലിക്കര ശ്രീ അയ്യപ്പ കോളേജ് സയൻസ് ക്ലബ്ബിന്റെയും ഭൂമിത്ര ക്ലബ്ബിന്റെയും പമ്പ പുനർജനിയുടെയും സംയുക്താഭിമുഖ്യത്തിൽ പുഴകൾ ഭാവിയിലേക്ക് എന്ന വിഷയത്തിൽ ഏകദിന ദേശീയ സെമിനാറും ശിൽപശാലയും നടത്തി. കേന്ദ്ര ഭൂഗർഭജല വകുപ്പ് കേരള മേഖലാ ഡയറക്ടർ ഡോ. കെ ആർ സൂര്യനാരായണ സെമിനാർ ഉദ്ഘാടനം ചെയ്തു. കേരളത്തിൽ ഭൂഗർഭ ജലത്തിന്റെ ലഭ്യത ഗണ്യമായ അളവിൽ കുറഞ്ഞിട്ടുണ്ടെന്നും ഭാവിയിൽ ഭീതീകരമായ ജലദൗർലഭ്യം ഉണ്ടാകുമെന്നും അടുത്തകാലത്തു നടന്ന പഠനവിവരത്തെ അടിസ്ഥാനമാക്കി അദ്ദേഹം ചൂണ്ടിക്കാട്ടി.
കേന്ദ്ര ജലവകുപ്പ് സൂപ്രണ്ട് എഞ്ചിനീയർ വി. മോഹൻ മുരളി മുഖ്യപ്രഭാഷണം നടത്തി. കോളേജ് പ്രിൻസിപ്പൽ ഡോ. കെ എസ് അനിൽ കുമാർ അധ്യക്ഷത വഹിച്ചു. ‘മഴവെള്ള സംഭരണം -ആർട്ടിഫിഷൽ റീചാർജിലൂടെ ‘എന്ന വിഷയത്തിൽ കേന്ദ്ര ഭൂഗർഭ ജല വകുപ്പ് ശാസ്ത്രജ്ഞ വി. ആർ റാണിയും ‘പമ്പയിലെ ഗുണനിലവാര പഠനം’ എന്ന വിഷയത്തിൽ കേന്ദ്ര ജലവകുപ്പ് അസിസ്റ്റന്റ് റിസർച്ച് ഓഫീസർ മൃണാൾ ബരൂവയും ക്ലാസെടുത്തു.
പമ്പാപുനർജനി പ്രസിഡന്റ് എം. എൻ രാധാകൃഷ്ണൻ നായർ, സെക്രട്ടറി ജഗദാനന്ത്‌ പി വി, അനീഷ് എൻ കുറുപ്പ്, വിശ്വനാഥൻ, ഡോ. നിത, ഡോ. ഗംഗ, സുരേഷ് അമ്പിലേത്ത് എന്നിവർ പ്രസംഗിച്ചു.
