കൊച്ചി : ഏറണാകുളത്ത് ശക്തമായ കാറ്റും മഴയും തുടരുകയാണ്. ജില്ലയില്‍ നാലു ദുരിതാശ്വാസ ക്യാമ്പുകള്‍ തുറന്നു. കൊച്ചി താലൂക്കില്‍ മൂന്നും കണയന്നൂര്‍ താലൂക്കില്‍ ഒരു ക്യാമ്പുമാണ് തുറന്നത്. നാല് ക്യാമ്പുകളിലുമായി എട്ടു കുടുംബങ്ങളില്‍ നിന്നായി 6 പുരുഷന്മാരും 16 സ്ത്രീകളും 14 കുട്ടികളുമുള്‍പ്പടെ 36 അന്തേവാസികളാണുള്ളത് . ചെല്ലാനം സെന്റ് മേരീസ് ഹൈസ്കൂളില്‍ പ്രവര്‍ത്തനം ആരംഭിച്ച ക്യാമ്പില്‍ രണ്ടു കുടുംബങ്ങളില്‍ നിന്നായി 3 പുരുഷന്മാരും 3 സ്ത്രീകളും 2 കുട്ടികളുമുള്‍പ്പടെ 8 പേരാണുള്ളത്.
കണ്ടങ്കടവ് സെന്റ് സേവിയേഴ്സില്‍ ആരംഭിച്ച ക്യാമ്പില്‍ ഒരു കുടുംബത്തിലെ ഒരു പുരുഷനും ഒരു സ്ത്രീയും 3 കുട്ടികളുമുള്‍പ്പടെ അഞ്ചു പേരും നായരമ്പലം ദേവിവിലാസം ഹൈസ്കൂളില്‍ ആരംഭിച്ച ക്യാമ്പില്‍ 3 കുടുംബങ്ങളില്‍ നിന്നായി ഒരു പുരുഷനും 8 സ്ത്രീകളും 6 കുട്ടികളുമുള്‍പ്പടെ 15 പേരുമാണുള്ളത്. കണയന്നൂര്‍ താലൂക്കില്‍ കടവന്ത്ര കേന്ദ്രീയ വിദ്യാലയത്തില്‍ ആരംഭിച്ച ക്യാമ്പില്‍ രണ്ടു കുടുംബങ്ങളില്‍ നിന്നായി ഒരു പുരുഷനും 4 സ്ത്രീകളും 3 കുട്ടികളുമുള്‍പ്പടെ 8 പേരുമാണുള്ളത്.
