ഏത് എണ്ണയാണ് പൊതുവേ നല്ലത് എന്ന ചോദ്യമുണ്ടാകും. കേരളത്തില്‍ പണ്ടുമുതല്‍ കൂടുതലായി ഉപയോഗിച്ച് വരുന്നത് വെളിച്ചെണ്ണയാണ്. വെളിച്ചെണ്ണയ്ക്ക് ആരോഗ്യ ഗുണങ്ങളുണ്ട്. എന്നാല്‍ അമിതമായി ഉപയോഗിച്ചാല്‍ ഇത് ദോഷം വരുത്തും. ഇതില്‍ സാച്വറേറ്റഡ് ഫാറ്റി ആസിഡുകള്‍ കൂടുതലുണ്ട്. ഇത് അമിതമാകുന്നത് നല്ലതല്ല. പോളി സാച്വറേറ്റഡ് ഫാറ്റി ആസിഡുകള്‍ അടങ്ങിയ എണ്ണയാണ് കൂടുതല്‍ നല്ലത്. എന്നാല്‍ എല്ലാതരം പാചകരീതികള്‍ക്കും ഇത്തരത്തിലെ എണ്ണകള്‍ ഉപയോഗിയ്ക്കാനും സാധിയ്ക്കില്ല. വെളിച്ചെണ്ണയുടെ സ്‌മോക്കിംഗ് പോയന്റ് 175 ആണ്. ബട്ടര്‍ ഏതാണ്ട് ഇത് തന്നെയാണ്. സോയാബീന്‍, സണ്‍ഫ്‌ളവര്‍ ഓയില്‍ എന്നിവയുടെ സ്‌മോക്കിംഗ് പോയന്റ് 230 ആണ്. കനോല ഓയിലില്‍ 200 സ്‌മോക്കിംഗ് പോയന്റ് വരുന്നു. ചൂടാക്കാന്‍ ഏറ്റവും നല്ലത് അവോക്കാഡോ ഓയിലാണ്. ഇതിന്റെ സ്‌മോക്കിംഗ് പോയന്റ് എന്നത് 270 ആണ്.
സണ്‍ഫ്‌ളവര്‍ ഓയിലിന്റെ സ്‌മോക്കിംഗ് പോയന്റ് കൂടുതലാണെങ്കിലും നമുക്ക് ലഭിക്കുന്നത് മായം കലര്‍ന്നതാണ്. കാരണം ശുദ്ധമായ സണ്‍ഫ്‌ളവര്‍ ഓയിലിന് കൂടുതല്‍ വിലയാണ്. സാലഡിന് ഏറ്റവും ഗുണകരം ഒലീവ് ഓയിലാണ്. ചെറിയ ചൂടാക്കുന്നതിന് വെളിച്ചെണ്ണ നല്ലതാണ്. ഡീപ് ഫ്രൈ ആണെങ്കില്‍ വെജിറ്റബിള്‍ ഓയില്‍, കനോല ഓയില്‍ എന്നിവ ഉപയോഗിയ്ക്കാം. ഗ്രില്‍ ചെയ്യുന്നുവെങ്കില്‍ അവോക്കാഡോ ഓയിലാണ് നല്ലത്. കഴിവതും ഭക്ഷണ പദാർത്ഥങ്ങൾ മുക്കിപ്പൊരിച്ച് കഴിയ്ക്കാതിരിയ്ക്കുക. ഇത് ആരോഗ്യത്തിന് ദോഷം ചെയ്യും. ഉദാഹരണം മീന്‍ തന്നെ. കറി വെച്ച് കഴിച്ചാല്‍ ഏറെ ആരോഗ്യകരമാകുന്ന ഇത് വറുക്കുമ്പോള്‍ ഗുണം നഷ്ടപ്പെട്ട് ദോഷമാകുന്നു. വറുക്കുന്നുവെങ്കില്‍ തന്നെ മുക്കിപ്പൊരിയ്ക്കാതെ അല്‍പം ഓയില്‍ മാത്രം ഉപയോഗിച്ച് ഷാലോ ഫ്രൈ ചെയ്യുന്നതാണ് നല്ലത്.
