നല്ല ഉറക്കം ശാരീരിക ആരോഗ്യത്തിന് മാത്രമല്ല മാനസിക ക്ഷേമത്തിനും അത്യാവശ്യമാണ്. ആരോഗ്യം നിലനിര്‍ത്താന്‍ ഒരു വ്യക്തി ദിവസവും 7 മുതല്‍ 8 മണിക്കൂര്‍ വരെയെങ്കിലും കണ്ണുകള്‍ക്ക് വിശ്രമം നല്‍കണമെന്നാണ് പറയുന്നത്. നാഷണല്‍ സ്ലീപ്പ് ഫൗണ്ടേഷന്‍ അനുസരിച്ച് 26 മുതല്‍ 64 വയസ്സ് വരെ പ്രായമുള്ള മുതിര്‍ന്നവര്‍ ദിവസവും കുറഞ്ഞത് 7 മുതല്‍ 9 മണിക്കൂര്‍ വരെ ഉറങ്ങണം. 64 വയസ്സിനു മുകളിലുള്ള മുതിര്‍ന്നവര്‍ ദിവസവും 7 മുതല്‍ 8 മണിക്കൂര്‍ വരെ ഉറങ്ങേണ്ടതുണ്ട്. കൗമാരക്കാര്‍ക്ക് ഏകദേശം 9 മുതല്‍ 10 മണിക്കൂര്‍ വരെ ഉറങ്ങണം. സ്‌കൂള്‍ പ്രായത്തിലുള്ള കുട്ടികള്‍ക്കും പ്രീ-സ്‌കൂള്‍ കുട്ടികള്‍ക്കും ഈ സമയം അതിലും കൂടുതലാണ്. ഇത് മാത്രമല്ല നിങ്ങളുടെ ലിംഗഭേദവും പ്രധാനമാണെന്ന് സമീപകാല പഠനം സൂചിപ്പിക്കുന്നു. അടുത്ത കാലത്തായി സ്ത്രീകള്‍ പുരുഷന്മാരേക്കാള്‍ 20 മിനിറ്റ് കൂടുതല്‍ ഉറങ്ങണമെന്നാണ് പഠനങ്ങള്‍ തെളിയിച്ചിരിക്കുന്നത്. എന്തുകൊണ്ടാണ് സ്ത്രീകള്‍ക്ക് പുരുഷന്മാരേക്കാള്‍ കൂടുതല്‍ ഉറക്കം ആവശ്യമായി വരുന്നത്. പുരുഷന്മാരെ അപേക്ഷിച്ച് സ്ത്രീകള്‍ അനുഭവിക്കുന്ന മോശം ഉറക്കമാണ് ഇതിന് കാരണം. പല കാരണങ്ങളാല്‍ സംഭവിക്കുന്ന ഉറക്കക്കുറവ് പരിഹരിക്കാന്‍ സ്ത്രീകള്‍ക്ക് സമയം ആവശ്യമാണ്.
സ്ത്രീകള്‍ പുരുഷന്മാരേക്കാള്‍ തിരക്കേറിയ ജീവിത രീതിയാണ് നയിക്കുന്നത്. അവര്‍ നേരത്തെ ഉണരുന്നു, കുട്ടികളെ പരിപാലിക്കുന്നു, വീട്ടുജോലികള്‍ കൈകാര്യം ചെയ്യുന്നു, അതിനാല്‍ അവര്‍ക്ക് കൂടുതല്‍ വിശ്രമം ലഭിക്കണമെന്നതില്‍ അതിശയിക്കാനില്ല. ദിവസം മുഴുവനുമുള്ള മള്‍ട്ടി ടാസ്‌കിംഗ് വളരെ ക്ഷീണിപ്പിക്കുന്നതാണ്, കൂടാതെ വളരെയധികം മാനസിക ഊര്‍ജ്ജവും ആവശ്യമാണ്. മതിയായ ഉറക്കത്തിന്റെ അഭാവം നിങ്ങളുടെ ശരീരത്തെയും മനസ്സിനെയും ദോഷകരമായി ബാധിക്കും. കൂടാതെ ഒരു സ്ത്രീയുടെ മസ്തിഷ്‌കം പുരുഷന്റേതില്‍ നിന്ന് വ്യത്യസ്തമായ രീതിയിലാണെന്ന് ചിലര്‍ പറയുന്നു. കൂടാതെ വീട്ടിലെയും ഓഫീസിലെയും ദൈനംദിന ജോലികളില്‍പ്പോലും ഒരു മനുഷ്യന്റെ തലച്ചോറിനേക്കാള്‍ കൂടുതല്‍ ഉപയോഗത്തിലാണെന്നും പറയപ്പെടുന്നു. ഒരു സ്ത്രീയുടെ മസ്തിഷ്‌കം ഒരു പുരുഷനെക്കാള്‍ കൂടുതല്‍ പ്രവര്‍ത്തിക്കുന്നതിനാല്‍ അത് വീണ്ടെടുക്കാന്‍ കൂടുതല്‍ സമയം ആവശ്യമാണെന്ന് പഠനങ്ങള്‍ അവകാശപ്പെടുന്നു. അതുകൊണ്ടാണ് സ്ത്രീകള്‍ കൂടുതല്‍ ഉറങ്ങേണ്ടത്.
ശരിയായ അളവിലുള്ള ഉറക്കക്കുറവ് മൂലം വിഷാദം, ദേഷ്യം, വിഷമം, പ്രകോപനം തുടങ്ങിയ പ്രശ്‌നങ്ങള്‍ ഉണ്ടാകാം. നേരെമറിച്ച് പുരുഷന്മാര്‍ ഉറക്കമില്ലായ്മ അനുഭവിക്കുന്നുണ്ടെങ്കില്‍ ഉറക്കക്കുറവിന്റെ അത്തരം ലക്ഷണങ്ങള്‍ കാണിക്കില്ല. മതിയായ സമയം ഉറങ്ങാത്തതിനാല്‍ മറ്റ് പല ആരോഗ്യ അപകടങ്ങളും ഉണ്ടാകാം. സ്ത്രീകള്‍ക്ക് ഒരേ സമയം ടെലിവിഷന്‍ കാണാനും പച്ചക്കറികള്‍ നുറുക്കാനും ഫോണില്‍ സംസാരിക്കാനും കഴിയും, അതും മികച്ച കാര്യക്ഷമതയോടെ. ഓഫീസോ വീടോ ആകട്ടെ, സ്ത്രീകള്‍ പല ജോലികളും ഒറ്റയടിക്ക് കൈകാര്യം ചെയ്യാറുണ്ട്. ഒരു പഠനമനുസരിച്ച്, ചില ജീവിത ഘട്ടങ്ങളും ശാരീരിക മാറ്റങ്ങളും കാരണം സ്ത്രീകള്‍ക്ക് ശരിയായ ഉറക്കം ലഭിക്കുന്നില്ല. പ്രായപൂര്‍ത്തിയായപ്പോള്‍ അവര്‍ അസ്വസ്ഥരാകുകയും ഉറക്കമില്ലായ്മയ്ക്ക് വിധേയരാകുകയും ചെയ്യുന്നു. ഉറക്കത്തിന്റെ ഗുണനിലവാരം അത്ര നല്ലതല്ലാത്തതിനാല്‍ അവര്‍ക്ക് അല്‍പ്പം കൂടുതല്‍ ഉറക്കം ആവശ്യമുള്ളതിന്റെ മറ്റൊരു കാരണമാണിത്.
ആര്‍ത്തവവിരാമം, ഗര്‍ഭാവസ്ഥ, പ്രതിമാസ ആര്‍ത്തവചക്രം എന്നിവയിലെ ഹോര്‍മോണ്‍ മാറ്റങ്ങള്‍ സ്ത്രീകളില്‍ ഗുരുതരമായ പാര്‍ശ്വഫലങ്ങള്‍ ഉണ്ടാക്കാം. ഹോര്‍മോണ്‍ വ്യതിയാനം ശാരീരികവും വൈകാരികവുമായ മാറ്റങ്ങളിലേക്കും നയിക്കുന്നു, ഇത് ഉറക്കത്തിന്റെ ഗുണനിലവാരത്തെ തടസ്സപ്പെടുത്തുന്നു. ഇത് ശാരീരിക അസ്വസ്ഥതകളും വേദനയും നല്‍കുന്നു, അതിനാല്‍ സ്ത്രീകള്‍ക്ക് അല്‍പ്പം അധിക വിശ്രമം ആവശ്യമാണ്. പുരുഷന്മാരെ അപേക്ഷിച്ച് സ്ത്രീകള്‍ക്ക് ശരീരഭാരം കുറയ്ക്കാന്‍ ബുദ്ധിമുട്ടാണെന്നും ശരിയായ ഉറക്കമില്ലായ്മയാണ് കാരണമെന്നും നമുക്കെല്ലാവര്‍ക്കും അറിയാം. ഉറക്കക്കുറവ് ശരീരഭാരം വര്‍ദ്ധിപ്പിക്കുന്നതിന് കാരണമാകുന്നു. മാത്രമല്ല, ഉറക്കക്കുറവ് കോര്‍ട്ടിസോള്‍ എന്ന സ്‌ട്രെസ് ഹോര്‍മോണിന്റെ വളര്‍ച്ചയിലേക്ക് നയിക്കുന്നു. ഈ ഹോര്‍മോണ്‍ നിങ്ങളുടെ വിശപ്പ് വര്‍ദ്ധിപ്പിക്കുകയും അമിതവണ്ണത്തിലേക്ക് നയിക്കുകയും ചെയ്യും. ചില പഠനങ്ങള്‍ അനുസരിച്ച്, സ്ത്രീകള്‍ക്ക് റെസ്റ്റ്‌ലസ്സ് ലെഗ് സിന്‍ഡ്രോം ഉണ്ടാകാനുള്ള സാധ്യത കൂടുതലാണ്. ഈ സിന്‍ഡ്രോം കാലുകള്‍ ചലിപ്പിക്കാനുള്ള അനിയന്ത്രിതമായ പ്രേരണയ്ക്ക് കാരണമാകുന്നു, വൈകുന്നേരവും രാത്രിയും ലക്ഷണങ്ങള്‍ വഷളാകുന്നു. ഈ പ്രശ്നം അനുഭവിക്കുന്ന സ്ത്രീകള്‍ക്ക് രാത്രിയില്‍ നല്ല ഉറക്കം ലഭിക്കുന്നില്ല.
