റാന്നി : അയിരൂർ ഗ്രാമപഞ്ചായത്തിലുണ്ടായ ശക്തമായ കാറ്റിലും മഴയിലും വ്യാപക നാശനഷ്ടം. നിരവധി വീടുകൾക്ക് കേടുപാടുകൾ സംഭവിക്കുകയും കൃഷി നശിക്കുകയും ചെയ്തു. പഞ്ചായത്തിലെ 3, 4, 5 വാർഡുകളിലാണ് ഏറ്റവും കൂടുതൽ നാശനഷ്ടമുണ്ടായത്. മറ്റുവാർഡുകളിലും മരങ്ങൾ ഒടിഞ്ഞുവീഴുകയും ഇലക്ട്രിക് പോസ്റ്റുകൾ ഒടിയുകയും ചെയ്തിട്ടുണ്ട്. ഓമന കുമാരി, ലീലാമ്മ മാത്യു, സജി പി.മാർക്കോസ്, മറിയാമ്മ വർഗീസ്, ജോൺ പി.പി., ഓമന മടിക്കോലിൽ, രാജേന്ദ്രൻ തെക്കേതോട്ടുപുറത്ത്, ഗോപാലകൃഷ്ണൻ താരത്തെകുറ്റ് എന്നിവരുടെ വീടുകൾക്ക് മരം ഒടിഞ്ഞുവീണതിനെ തുടര്‍ന്ന് നാശനഷ്ടമുണ്ടായി.
പഞ്ചായത്തിലെ ഈ വർഷത്തെ മികച്ച കർഷകനുള്ള ആദരവ് ലഭിച്ച ആദിദേവിന്റെ മുപ്പതോളം ഏത്തവാഴകളും കപ്പയും ശക്തമായ കാറ്റിൽ ഒടിഞ്ഞുവീണു. അയിരൂർ, റാന്നി കെ.എസ്.ഇ.ബി. സൗത്ത് സെക്ഷനുകളിലായി ഇരുപതിലധികം വൈദ്യുതി പോസ്റ്റുകൾ ഒടിഞ്ഞുവീഴുകയും ചെയ്തു. കെ.എസ്.ഇ.ബി.ക്ക് നാല് ലക്ഷത്തിലധികം രൂപയുടെ നാശനഷ്ടമുണ്ടായിട്ടുണ്ട്. കാറ്റിലും മഴയിലും വീടുകൾക്ക് നഷ്ടമുണ്ടായവർക്കും കൃഷിനാശം സംഭവിച്ച കർഷകർക്കും അടിയന്തിരമായി നഷ്ടപരിഹാരം നൽകണമെന്ന് ഗ്രാമപഞ്ചായത്ത് പ്രസിഡന്റ് സുരേഷ് പി.കുഴിവേലിൽ ബന്ധപ്പെട്ട വകുപ്പുകളോട് ആവശ്യപ്പെട്ടു.
