തിരുവനന്തപുരം: സംസ്ഥാനത്ത് വൈദ്യുതി പ്രതിസന്ധി രൂക്ഷമെന്ന് കെഎസ്ഇബി സര്ക്കാരിനെ അറിയിച്ചു. വിഷയത്തില് എന്ത് നടപടി സ്വീകരിക്കാമെന്നുള്ള റിപ്പോര്ട്ട് 21 ന് നല്കാന് കെഎസ്ഇബി ചെയര്മാന് മന്ത്രി നിര്ദേശം നല്കി. നിലവില് സംസ്ഥാനത്ത് കൂടിയ വിലക്ക് വൈദ്യുതി വാങ്ങുന്നതിനാണ് തീരുമാനം. പവര്കട്ട് വേണോയെന്ന് 21 ന് ശേഷം തീരുമാനിക്കും. ആഭ്യന്തര ഉത്പാദനം കുറഞ്ഞതോടെ, കടുത്ത പ്രതിസന്ധിയാണ് കേരളം നേരിടുന്നത്.
സംഭരണ ശേഷിയുടെ 30 ശതമാനം വെള്ളം മാത്രമാണ് സംസ്ഥാനത്തെ ഡാമുകളില് ശേഷിക്കുന്നത്. കഴിഞ്ഞവര്ഷം ഇതേസമയത്ത് 81 ശതമാനം വെള്ളമുണ്ടായിരുന്നു. ദിവസവും 10 കോടി രൂപയുടെ വൈദ്യുതിയാണ് പുറത്തു നിന്നും വാങ്ങുന്നത്. പുറത്ത് നിന്നും വൈദ്യുതി വാങ്ങുന്നതനുസരിച്ച് സര്ചാര്ജ് കൊണ്ടുവരാനാണ് ആലോചന. നിരക്ക് കൂട്ടാതെ മുന്നോട്ട് പോകാന് ആവില്ലെന്നാണ് വൈദ്യുതി മന്ത്രി കെ കൃഷ്ണന്കുട്ടി കഴിഞ്ഞദിവസം പറഞ്ഞത്.
