കോന്നി : പുനലൂർ മൂവാറ്റുപുഴ സംസ്ഥാന പാത നിർമ്മാണ പ്രവർത്തനവുമായി ബന്ധപെട്ട് എടുത്ത് മാറ്റിയ മണ്ണിൽ തടി ലോറിയുടെ ടയർ പുതഞ്ഞ് ലോറി ഒരു വശത്തേക്ക് ചരിഞ്ഞതിനെ തുടർന്ന് പുനലൂർ മൂവാറ്റുപുഴ റോഡിൽ മണിക്കൂറുകളോളം ഗതാഗതം തടസപ്പെട്ടു. കഴിഞ്ഞ ദിവസം പുലർച്ചെ ആയിരുന്നു സംഭവം. കോന്നി ഭാഗത്ത് നിന്നും പുനലൂർ ഭാഗത്തേക്ക് പാഴ് തടികൾ കയറ്റി കൊണ്ട് പോയ നാഷണൽ പെർമിറ്റ് ലോറിയുടെ ടയറുകൾ മണ്ണിൽ പുതഞ്ഞതിനെ തുടർന്ന് ഗതാഗതം തടസപ്പെടുകയായിരുന്നു.
മുറിഞ്ഞകല്ല് ഗുരുമന്ദിരത്തിന് സമീപം ആയിരുന്നു സംഭവം. ലോറി ഒരു വശത്തേക്ക് ചരിഞ്ഞത് മൂലം ലോഡ്ഡ് കെട്ടി മുറുക്കിയിരുന്ന വടം പൊട്ടി തടികൾ റോഡിലേക്ക് തെറിച്ച് വീണു. തുടർന്ന് മണിക്കൂറുകളോളം വാഹന ഗതാഗതം തടസപ്പെട്ടത്തോടെ വാഹനങ്ങൾ മുറിഞ്ഞകല്ല് അതിരുംങ്കൽ ഇഞ്ചപ്പാറ വഴി തിരിച്ച് വിട്ടു. തുടർന്ന് മണിക്കൂറുകൾ നീണ്ട പരിശ്രമത്തിന് ഒടുവിൽ ക്രയിൻ ഉപയോഗിച്ച് ലോറി മാറ്റിയതിന് ശേഷമാണ് ഗതാഗതം പുനസ്ഥാപിച്ചത്.
