റാന്നി : എം.എസ്.ടി.ടി.ഐ. റാന്നിയുടെ ആഭിമുഖ്യത്തിൽ റാന്നി പഴവങ്ങാടി ഗവ.എൽ.പി. സ്കൂളിൽ ലോക തപാൽ ദിനം ആചരിച്ചു. പരിപാടിയുടെ ഭാഗമായി തപാൽ സേവനങ്ങളുടെ പ്രാധാന്യത്തെക്കുറിച്ച് കുട്ടികൾക്ക് അറിവ് പകരുകയും ഇൻലൻഡ് ലെറ്റർ, പോസ്റ്റ് കാർഡ്, ഇലക്ട്രോണിക് തപാൽ സേവനങ്ങൾ, പോസ്റ്റ് ബോക്സ് എന്നിവ പരിചയപ്പെടുത്തുകയും ചെയ്തു. തപാൽ സംവിധാനത്തിന്‍റെ പ്രവർത്തനരീതികളും സമൂഹത്തിൽ തപാൽ വകുപ്പിന്‍റെ പ്രാധാന്യവും കുട്ടികൾക്ക് മനസിലാക്കുന്നതിനും പരിപാടി സഹായകരമായി. പഴവങ്ങാടി ഗ്രാമപഞ്ചായത്ത് പ്രസിഡന്‍റ് പ്രമോദ് മന്ദമരുതി ഉദ്ഘാടനം ചെയ്തു.
പഴവങ്ങാടി ഗ്രാമപഞ്ചായത്ത് അംഗം ബിനിറ്റ് ജിജി അധ്യക്ഷത വഹിച്ചു. പോസ്റ്റൽ അസിസ്റ്റന്‍റ് ജയരാജ് തപാൽ ഓഫീസ് പ്രവർത്തനങ്ങളെക്കുറിച്ചും വിവിധ തപാൽ സേവനങ്ങളെക്കുറിച്ചും വിശദീകരിച്ചു. തപാൽ സേവനരംഗത്തെ പ്രവർത്തനങ്ങളെ ആദരിക്കുന്നതിന്‍റെ ഭാഗമായി പോസ്റ്റ്മാൻ സുരാജ് എസ്.എസ്.നെ ചടങ്ങിൽ ആദരിച്ചു. എം.എസ്.ടി.ടി.ഐ. പ്രിൻസിപ്പൽ ജിയ ജോസ്, ഗവൺമെന്‍റ് എൽ.പി. സ്കൂൾ പ്രധാനാധ്യാപിക ജലജ കെ., ദിവ്യ ടി.ആർ., വികാസ് വർഗീസ് , ടിനി ജേക്കബ്‌, സുജിത്ത് പി., നീനു മേരി, അശ്വതി എന്നിവർ പ്രസംഗിച്ചു.
