പാലാ : ജാമ്യത്തിലിറങ്ങിയ മോഷണക്കേസ് പ്രതി, ബൈക്ക് മോഷണത്തിന് വീണ്ടും പോലീസ് പിടിയില്‍. വെള്ളിയേപ്പള്ളി പുതുശ്ശേരി വീട്ടില്‍ ദിലീപാണ് (37) അറസ്റ്റിലായത്. കഴിഞ്ഞ ദിവസം വെള്ളാപ്പാട് ചെമ്പകത്തില്‍ ബില്‍ഡിങ്ങിന്റെ പാര്‍ക്കിങ് ഏരിയയില്‍ നിന്ന് വിസ്മയ ബില്‍ഡേഴ്സ് ജീവനക്കാരന്‍ വള്ളിച്ചിറ താമരക്കുളം സ്വദേശി രഞ്ജിത്തിന്റെ ബൈക്ക് മോഷണം പോയിരുന്നു. വൈകീട്ടോടെ തിരികെ എത്തിയ ഉടമ വാഹനം മോഷണം പോയതറിഞ്ഞ് പാലാ പോലീസ് സ്റ്റേഷനിലെത്തി പരാതി നല്‍കി. തുടര്‍ന്ന്, വാഹന പരിശോധനയില്‍ വൈകീട്ടോടെ ടൗണ്‍ ബിവറേജസ് പരിസരത്തുവെച്ചാണ് മോഷണ വാഹനവുമായി ദിലീപ് പിടിയിലായത്. മറ്റൊരു മോഷണക്കേസില്‍ റിമാന്‍ഡിലായിരുന്ന ദിലീപ് ഒരാഴ്ച മുമ്പാണ് ജാമ്യത്തില്‍ ഇറങ്ങിയത്. പാലാ ജുഡീഷ്യല്‍ മജിസ്ട്രേറ്റ് കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
