കൊല്ലം : പള്ളിക്കാവില്‍ യുവാവിനെ കുത്തി കൊലപ്പെടുത്തി. ഓഞ്ചേഴുത്ത് കാവിന് സമീപം താമസിക്കുന്ന വിഷ്ണുവാണ് (29) കുത്തേറ്റ് മരിച്ചത്. പള്ളിക്കാവില്‍ താമസിക്കുന്ന തമിഴ്‌നാട് സ്വദേശിയും കാവനാട് മാര്‍ക്കറ്റില്‍ ഇറച്ചിവെട്ടുകാരനുമായ പ്രകാശ് ആണ് വിഷ്ണുവിനെ കുത്തിക്കൊലപ്പെടുത്തിയത്. ഇന്ന് രാവിലെ വിഷ്ണുവും പ്രകാശും തമ്മില്‍ പള്ളിക്കാവ് കരിമ്പോലില്‍കുളത്തിന് സമീപം വെച്ച്‌ വാക്ക് തര്‍ക്കവും തുടര്‍ന്ന് സോഡാ കുപ്പി കൊണ്ട് അടിപിടിയും നടന്നിരുന്നതായി നാട്ടുകാര്‍ പറയുന്നു.
ഇരുവരും പിരിഞ്ഞ് പോയ ശേഷം പ്രകാശ് വീട്ടിലെത്തി ഇറച്ചി വെട്ടാന്‍ ഉപയോഗിക്കുന്ന കത്തിയുമായി ജവാന്‍ മുക്കിന് സമീപം നിന്ന വിഷ്ണുവിനെ നെഞ്ചത്ത് വെട്ടി പരിക്കേല്‍പ്പിക്കുകയായിരുന്നു എന്നാണു റിപ്പോര്‍ട്ട്. പ്രതി പ്രകാശ് സംഭവസ്ഥലത്ത് നിന്നും രക്ഷപെട്ടു. കുത്തേറ്റ് വിഷ്ണു റോഡില്‍ കിടന്നെങ്കിലും ശക്തികുളങ്ങര പോലീസെത്തിയാണ് ജില്ല ആശുപത്രിയിലേക്ക് കൊണ്ട് പോയത്. ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. പ്രതിക്കായി പോലീസ് തിരച്ചില്‍ ആരംഭിച്ചു.
