പാലക്കാട് : ഒരുകോടിരൂപ വിലമതിക്കുന്ന 3.2 കിലോ ഹാഷിഷ് ഓയിലുമായി യുവാക്കള് അറസ്റ്റില്. മലപ്പുറം മേലാറ്റൂര് വെള്ളിയഞ്ചേരി സ്വദേശികളായ മുഹമ്മദ് റാഷിദ്(27), മുജീബ് റഹ്മാന്(36)എന്നിവരെയാണ് പാലക്കാട് ടൗണ് നോര്ത്ത് പോലീസ് അറസ്റ്റ് ചെയ്തത്. ശനിയാഴ്ച രാവിലെ ഒലവക്കോട് റെയില്വേ സ്റ്റേഷന് റോഡില് ജില്ലാ ലഹരിവിരുദ്ധ സ്ക്വാഡും ടൗണ് നോര്ത്ത് പോലീസും നടത്തിയ സംയുക്ത പരിശോധനയിലാണ് ലഹരിക്കടത്ത് പിടികൂടിയത്. ആന്ധ്രപ്രദേശിലെ പാഡേരുവില് നിന്നാണ് ട്രെയിനില് ഹാഷീഷ് ഓയില് കൊണ്ടുവന്നതെന്ന് പ്രതികള് സമ്മതിച്ചു.
തൃശൂര് ജില്ലയിലെ ഇടപാടുകാരന് കൈമാറാനായിരുന്നു പദ്ധതി. പ്രതികള് മുമ്പും സമാനരീതിയില് ലഹരിവസ്തുക്കള് കടത്തിയതായി കണ്ടെത്തി. പ്രതികളില്നിന്ന് ലഭിച്ച വിവരത്തിന്റെ അടിസ്ഥാനത്തില് ലഹരിക്കടത്ത് ഇടപാടുകാരെ കണ്ടെത്താനും ഉറവിടം സംബന്ധിച്ചും അന്വേഷണം ഊര്ജിതമാക്കി.
നര്കോട്ടിക് സെല് ഡിവൈഎസ്പി സി ഡി ശ്രീനിവാസന്, ടൗണ് നോര്ത്ത് എസ്ഐ രാജേഷ്, സീനിയര് സിപിഒ സലീം, സിപിഒ സുരേഷ്കുമാര്, ലഹരിവിരുദ്ധ സ്ക്വാഡ് അംഗങ്ങളായ ടി ആര് സുനില്കുമാര്, റഹീം മുത്തു, സൂരജ് ബാബു, കെ അഹമ്മദ് കബീര്, ആര് വിനീഷ്, ആര് രാജീദ്, എസ് ഷമീര്, സൈബര് സെല് ഉദ്യോഗസ്ഥന് കെ വി ഗോവിന്ദനുണ്ണി എന്നിവരടങ്ങിയ സംഘമാണ് പ്രതികളെ പിടികൂടിയത്.