റാന്നി : അപ്രതീക്ഷിത പ്രളയത്തിൽ വീടുകളിൽ വെള്ളം കയറി ദുരിതത്തിലായ കുടുംബങ്ങൾക്ക് ആശ്വാസവുമായി റാന്നി നിലയ്ക്കൽ മാർത്തോമ യുവജനസഖ്യവും കാര്ഡും (ക്രിസ്ത്യൻ ഏജൻസി ഫോർ റൂറൽ ഡെവലപ്മെന്റ്). ദുരിതബാധിതർക്കായി അരിയും അത്യാവശ്യ പലവ്യഞ്ജനങ്ങളും അടങ്ങിയ കിറ്റുകളാണ് സംഘടനകളുടെ നേതൃത്വത്തിൽ വിതരണം ചെയ്തത്. അങ്ങാടി പഞ്ചായത്തിലെ 8, 10, 12 വാർഡുകളിൽ പമ്പാനദിയുടെ തീരത്ത് താമസിക്കുന്ന വെള്ളപ്പൊക്കത്തിൽ ദുരിതമനുഭവിച്ച കുടുംബങ്ങൾക്കാണ് സഹായമെത്തിച്ചത്. അങ്ങാടി പഞ്ചായത്ത് രണ്ടാം വാർഡ് മെമ്പർ ജോജി മാത്യു, കൗൺസിൽ അംഗം പ്രമോദ് തേനാലിൽ, യുവജനസഖ്യം അംഗം അലൻ ജോയൽ, ശ്രീനി ശാസ്താംകോവിൽ എന്നിവർ ദുരിതാശ്വാസ കിറ്റുകളുടെ വിതരണത്തിന് നേതൃത്വം നൽകി.
