ഇസ്‌ലാമാബാദ് : തന്റെ ഇളയമകൾ അസീഫ ഭൂട്ടോയെ (31) പാകിസ്താന്റെ പ്രഥമവനിതയാക്കാൻ പ്രസിഡന്റ് ആസിഫ് അലി സർദാരി തീരുമാനിച്ചതായി റിപ്പോർട്ടുകൾ. പ്രസിഡന്റിന്റെ ഭാര്യയാണ് സാധാരണ പ്രഥമവനിതയാകുക. എന്നാൽ, ഭാര്യ ബേനസീർ ഭൂട്ടോ 2007-ൽ കൊല്ലപ്പെട്ടശേഷം സർദാരി വിവാഹം കഴിച്ചിട്ടില്ല. 2008-2013 കാലത്ത് സർദാരി പ്രസിഡന്റായിരുന്നപ്പോൾ പ്രഥമവനിതാ പദത്തിൽ ആരുമുണ്ടായിരുന്നില്ല. ഇത്തവണ പതിവിനു വിരുദ്ധമായി മകളെ പ്രഥവനിതയാക്കുകയാണ് സർദാരി. ഞായറാഴ്ച നടന്ന സത്യപ്രതിജ്ഞാച്ചടങ്ങിൽ ആസീഫ സർദാരിക്കൊപ്പമുണ്ടായിരുന്നു. ഇത്തവണ പി.പി.പി.യുടെ പ്രചാരണത്തിലും അവർ സജീവമായിരുന്നു.
ഭാര്യക്കുപകരം മറ്റുള്ളവർ പ്രഥമവനിതകളായ സംഭവം യു.എസിലുണ്ട്. വിഭാര്യനായിരുന്ന യു.എസ്. മുൻ പ്രസിഡന്റ് ആൻഡ്രൂ ജാക്സൺ അനന്തരവൾ എമിലി ഡോണെൽസണിനോട് പ്രഥവനിതയുടെ ചുമതല വഹിക്കാൻ പറഞ്ഞിട്ടുണ്ട്. ചെസ്റ്റർ ആർതർ, ഗ്രോവർ ക്ലീവ്‌ലൻഡ് എന്നീ മുൻ യു.എസ്. പ്രസിഡന്റുമാർ സഹോദരിമാരെയാണ് പ്രഥമവനിതയുടെ ചുമതലയേൽപ്പിച്ചത്.
