അമൃത്സര്: പഞ്ചാബിലെ അമൃത്സറിലെ സുവര്ണ്ണ ക്ഷേത്രത്തിന് സമീപം രാവിലെയുണ്ടായ സ്ഫോടനത്തില് ഒരാള്ക്ക് പരിക്കേറ്റു. മൂന്നു ദിവസത്തിനിടെ ഇത് രണ്ടാം തവണയാണ് ഇവിടെ സ്ഫോടനമുണ്ടാകുന്നത്. ശനിയാഴ്ച സ്ഫോടനമുണ്ടായ അതേ സ്ഥലത്താണ് ഇന്നും സ്ഫോടനമുണ്ടായത്.
അന്ന് ഒരാള്ക്ക് പരിക്കേല്ക്കുകയും ചില കെട്ടിടങ്ങളുടെ കണ്ണാടിച്ചില്ലുകള് ഉടയുകയും ചെയ്തിരുന്നു. ക്ഷേത്രത്തിലേക്ക് നീളുന്ന പാതയുടെ സമീപത്താണ് സ്ഫോടനം ഉണ്ടായത്. സ്ഫോടനത്തിന്റെ കാരണം ഇതുവരെ കണ്ടെത്താനായിട്ടില്ലെന്നും സംഭവത്തിന്റെ കാരണം പരിശോധിച്ചുവരികയാണെന്നും പോലീസ് പറഞ്ഞു. സുവര്ണ ക്ഷേത്രത്തിന്റെ ഒരു കിലോമീറ്റര് ചുറ്റളവില് സ്ഫോടനത്തിന്റെ ശബ്ദം കേട്ടതായി പിടിഐ സൂചിപ്പിച്ചു. ഫോറന്സിക് സംഘം സ്ഥലത്തെത്തി അന്വേഷണം നടത്തിവരികയാണെന്ന് പോലീസ് പറഞ്ഞു. ‘ഞങ്ങള് പരിശോധിച്ചുവരികയാണ്. ഇവിടെ സ്ഥിതി സാധാരണമാണ്. ആന്റി സബോട്ടേജ്, ബോംബ് സ്ക്വാഡ്, എഫ്എസ്എല് ടീമുകള് ഇവിടെയുണ്ട്,’ അമൃത്സര് അഡീഷണല് ഡെപ്യൂട്ടി പോലീസ് കമ്മീഷണര് മെഹ്താബ് സിംഗ് എഎന്ഐയോട് പറഞ്ഞു.
