നോയിഡ: കാണാതായ രണ്ട് വയസുകാരിയുടെ മൃതദേഹം അയല്വാസിയുടെ വാതിലില് തൂക്കിയിട്ട ബാഗിനുള്ളില് കണ്ടെത്തി. ഗ്രേറ്റര് നോയിഡയിലാണ് സംഭവം. അയല്വാസി ഒളിവിലാണ്. കുട്ടിയുടെ കുടുംബം വാടകയ്ക്ക് താമസിക്കുന്ന അതേ കെട്ടിടത്തിലാണ് പ്രതിയും താമസിച്ചിരുന്നതെന്നും പൊലീസ് പറയുന്നു. കുട്ടിയെ ശ്വാസം മുട്ടിച്ച് കൊലപ്പെടുത്തിയെന്നാണ് സംശയം. ഏപ്രില് 7 നാണ് ദേവ്ല ഗ്രാമത്തിലെ വാടക വീട്ടില്നിന്ന് കുട്ടിയെ കാണാതായത്.
കുട്ടിയുടെ മാതാപിതാക്കള് അടുത്തുള്ള ഒരു ഫാക്ടറിയില് ജോലി ചെയ്യുന്നവരാണ്. കുട്ടിയുടെ പിതാവ് ശിവകുമാര് ജോലിക്കും അമ്മ മഞ്ജു മാര്ക്കറ്റില് പോയ സമയത്താണ് കുട്ടിയെ കാണാതായത്. കുട്ടിയെ തെരഞ്ഞെങ്കിലും കണ്ടെത്താന് കഴിഞ്ഞില്ല. പിറ്റേ ദിവസം മാതാപിതാക്കള് സൂരജ്പൂര് പോലീസ് സ്റ്റേഷനില് പരാതി നല്കി. രണ്ട് ദിവസത്തിന് ശേഷം അയല്വാസിയായ രാഘവേന്ദ്രയുടെ പൂട്ടിയിട്ട വീട്ടില് നിന്ന് ദുര്ഗന്ധം വമിക്കുന്നതായി ശിവകുമാര് പരാതിപ്പെട്ടു. പോലീസിന്റെ സഹായത്തോടെ ശിവകുമാര് വീട്ടില് കയറി പരിശോധിച്ചപ്പോഴാണ് വാതിലില് തൂക്കിയിട്ട ബാഗില് കുട്ടിയുടെ മൃതദേഹം കണ്ടെത്തിയത്.
