പത്തനംതിട്ട : മൂന്ന് സ്പെഷ്യല് ട്രെയിനുകളിലായി ഇതരസംസ്ഥാനങ്ങളില് നിന്ന് പത്തനംതിട്ട ജില്ലക്കാരായ 206 പേര്കൂടി ബുധനാഴ്ച്ച വൈകിട്ടും വ്യാഴാഴ്ച്ച രാവിലെയുമായി എത്തി. ഇവരില് 72 പേരെ കോവിഡ് കെയര് സെന്ററിലും 134 പേരെ വീടുകളിലും നിരീക്ഷണത്തിലാക്കി.
രാജ്ഘോട്ട്-തിരുവനന്തപുരം സ്പെഷ്യല് ട്രെയിനില് 48 സ്ത്രീകളും 99 പുരുഷന്മാരും ഉള്പ്പെടെ 147 പത്തനംതിട്ട ജില്ലക്കാരാണ് എത്തിയത്. ഇവരെല്ലാം ബുധനാഴ്ച്ച കോട്ടയം റെയില്വേ സ്റ്റേഷനില് ഇറങ്ങി. ഇവരെ മൂന്നു കെ.എസ്.ആര്.ടി.സി ബസുകളിലും ഒരു ടെമ്പോ ട്രാവലറിലുമായി രാത്രിയോടെ തിരുവല്ലയിലും പത്തനംതിട്ടയിലും എത്തിച്ചു. ഇവരില് 57 പേരെ കോവിഡ് കെയര് സെന്ററുകളിലും 90 പേരെ വീടുകളിലും നിരീക്ഷണത്തിലാക്കി.
താനെ-എറണാകുളം സ്പെഷ്യല് ട്രെയിന് വ്യാഴാഴ്ച്ച പുലര്ച്ചെ 5.10ന് എറണാകുളം റെയില്വേ സ്റ്റേഷനില് എത്തി. ഒന്പത് സ്ത്രീകളും അഞ്ചു പുരുഷന്മാരും ഉള്പ്പെടെ 14 ജില്ലക്കാരായിരുന്നു എറണാകുളം റെയില്വേ സ്റ്റേഷനില് ഉണ്ടായിരുന്നത്. ഇവരെ കെ.എസ്.ആര്.ടി.സി ബസില് രാവിലെ 10 ന് പത്തനംതിട്ട ഇടത്താവളത്തില് എത്തിച്ചു. നാലു പേരെ കോവിഡ് കെയര് സെന്ററിലും 10 പേരെ വീടുകളിലും നിരീക്ഷണത്തിലാക്കി.
ന്യൂഡല്ഹി- തിരുവനന്തപുരം സ്പെഷ്യല് ട്രെയിനില് വ്യാഴാഴ്ച്ച പുലര്ച്ചെ 5.10ന് തിരുവനന്തപുരം റെയില്വേ സ്റ്റേഷനില് എത്തി. 21 സ്ത്രീകളും 24 പുരുഷന്മാരും ഉള്പ്പെടെ 45 ജില്ലക്കാരാണു ഇവിടെ ഇറങ്ങിയത്. ഇവരെ രണ്ടു കെ.എസ്.ആര്.ടി.സി ബസുകളിലും ഒരു ടെമ്പോ ട്രാവലറിലുമായി രാവിലെ 10 മണിയോടെ പത്തനംതിട്ട ഇടത്താവളത്തില് എത്തിച്ചു. 11 പേരെ കോവിഡ് കെയര് സെന്ററിലും 34 പേരെ വീടുകളിലും നിരീക്ഷണത്തിലാക്കി. ഇതുവരെ ഇതര സംസ്ഥാനങ്ങളില് നിന്ന് പത്ത് സ്പെഷ്യല് ട്രെയിനുകളിലായി വ്യാഴാഴ്ച ഉച്ചവരെ ജില്ലക്കാരായ 1020 പേരാണ് എത്തിയിട്ടുള്ളത്