കൊല്ലം : ട്രെയിനിലെ സീറ്റുകള്ക്ക് അടിയില് ഒളിപ്പിച്ചു വെച്ച നിലയില് 20.12 കിലോഗ്രാം കഞ്ചാവ് കണ്ടെടുത്തു. ചെന്നൈ എഗ്മൂറില് നിന്ന് കൊല്ലത്ത് എത്തിയ അനന്തപുരി എക്സ്പ്രസില് നിന്നാണ് കഞ്ചാവ് ശേഖരം കണ്ടെത്തിയത്. എസ്-മൂന്ന് കോച്ചിന്റെ സീറ്റുകള്ക്ക് അടിയില് ബാഗുകളില് ഒളിപ്പിച്ച നിലയിലായിരുന്ന കഞ്ചാവ് ആര്.പി.എഫ് ആണ് കസ്റ്റഡിയിലെടുത്തത്. വിപണിയില് 10 ലക്ഷം രൂപ വില വരുമെന്നാണ് കണക്കുകൂട്ടല്. കഞ്ചാവ് മൂന്ന് ഷോള്ഡര് ബാഗുകളിലായിട്ടാണ് കണ്ടെത്തിയത്. രണ്ട് കിലോ, ഒരു കിലോ, അര കിലോ, 250 ഗ്രാം എന്നീ അളവുകളിലാക്കി പേപ്പര് പൊതിഞ്ഞ് സെല്ലോ ടേപ്പ് ചുറ്റി കണ്സീല്ഡ് ചെയ്ത 11 പാക്കറ്റുകളാക്കിയാണ് കണ്ടെത്തിയത്. ഒരു ബാഗിന്റെ പൗച്ചില് നിന്ന് രണ്ട് സിം കാര്ഡുകളും ലഭിച്ചു.
വര്ക്കല റെയില്വേ സ്റ്റേഷന് സമീപം ട്രെയിന് എത്തിയപ്പോഴാണ് ബാഗുകള് ടിക്കറ്റ് പരിശോധകന്റെ ശ്രദ്ധയില്പെട്ടത്. ഉടന് തന്നെ സമീപത്ത് ഇരുന്ന ഏതാനും യുവാക്കള് ട്രെയിനില് നിന്ന് ഇറങ്ങിയോടി. ഇവരുടെ വിഡിയോ ദൃശ്യങ്ങള് ആര്.പി.എഫിന് ലഭിച്ചിട്ടുണ്ട്. ട്രെയിന് കൊല്ലത്ത് എത്തിയപ്പോള് ആര്.പി.എഫ് ഇന്സ്പെക്ടര് രജനി നായരുടെ നേതൃത്വത്തില് പരിശോധന നടത്തി. നടപടികള് പൂര്ത്തിയാക്കി കഞ്ചാവ് കൊല്ലത്തെ എക്സൈസ് ഉദ്യോഗസ്ഥര്ക്ക് കൈമാറി. കൊല്ലം എക്സൈസ് റേഞ്ച് ഓഫിസില് രജിസ്റ്റര് ചെയ്ത് അന്വേഷണം ആരംഭിച്ചതായി കൊല്ലം അസിസ്റ്റന്റ് എക്സൈസ് കമീഷണര് വി.റോബര്ട്ട് പറഞ്ഞു.
