ശ്രീനഗര് : ജമ്മു കശ്മീരില് രണ്ടിടത്തായി നടന്ന ഏറ്റുമുട്ടലില് രണ്ട് ഭീകരരെ സുരക്ഷാ സേന വധിച്ചതായി പോലീസ് അറിയിച്ചു. മൂന്ന് മണിക്കൂറിനുള്ളില് പുല്വാമയിലും ശ്രീനഗറിലുമാണ് ഏറ്റുമുട്ടല് നടന്നത്. കൊല്ലപ്പെട്ടവര് നിരോധിത സംഘടനയായ ലഷ്കര്-ഇ-ത്വയ്ബ പ്രവര്ത്തകരാണ്. ശ്രീനഗറില് അടുത്തിടെ നടന്ന പോലീസുകാരന്റെയും സിവിലിയന്റെയും കൊലപാതകത്തില് ഇവര് പങ്കളായായിട്ടുണ്ടെന്നും പോലീസ് വ്യക്തമാക്കി .
‘സൈന്യവും പോലീസും സി.ആര്.പി.എഫും ചേര്ന്ന് പുല്വാമയിലെ വഹിബഗ് മേഖലയിലാണ് ആദ്യ എന്കൗണ്ടര് ആരംഭിച്ചത്. ഗ്രാമത്തില് ഒളിച്ചിരുന്ന ഭീകരരോട് ആദ്യം കീഴടങ്ങാന് ആവശ്യപ്പെട്ടു. എന്നാല്, ഇവര് സുരക്ഷാ സേനക്ക് നേരെ വെടിയുതിര്ത്തതിനെ തുടര്ന്നുണ്ടായ ഏറ്റുമുട്ടലില് ഷാഹിദ് ബഷീര് ഷെയ്ഖ് എന്ന ഭീകരന് കൊല്ലപ്പെടുകയായിരുന്നു’. ഒരാഴ്ചക്കിടെ നടന്ന എട്ട് ഏറ്റുമുട്ടലുകളില് 11 ഭീകരര് കൊല്ലപ്പെട്ടതായി കശ്മീരിലെ ഇന്സ്പെക്ടര് ജനറല് ഓഫ് പോലീസ് വിജയ് കുമാര് അറിയിച്ചു. ഒക്ടോബര് രണ്ടിനും എട്ടിനും ഇടയില് നടന്ന ഭീകരാക്രമണങ്ങളില് ഏഴുപേരുമാണ് കൊല്ലപ്പെട്ടത് .
