റാഞ്ചി: കോവിഡ് സ്ഥിരീകരിച്ചതിന് പിന്നാലെ ബന്ധുക്കള് ആശുപത്രിയില് ഉപേക്ഷിച്ച രണ്ട് വയസുകാരന് മരിച്ചു. ജാര്ഖണ്ഡിലെ റാഞ്ചിയിലാണ് സംഭവം. കുട്ടി മരിച്ചതിനു ശേഷവും രക്ഷിതാക്കളെ കണ്ടെത്താന് കഴിയാതെ വന്നതോടെ ആശുപത്രി അധികൃതര് കുഞ്ഞിന്റെ ശവസംസ്കാര ചടങ്ങുകള് നടത്തി. ജാര്ഖണ്ഡിലെ രാജേന്ദ്ര ഇന്സ്റ്റിറ്റ്യൂട്ട് ഓഫ് മെഡിക്കല് സയന്സസ് (റിംസ്) ആശുപത്രിയിലാണ് ബന്ധുക്കള് കോവിഡ് സ്ഥിരീകരിച്ച കുഞ്ഞിനെ ഉപേക്ഷിച്ച് കടന്നു കളഞ്ഞത്.
ആശുപത്രിയിലെ വാര്ഡ് ബോയ് രോഹിത് ബേഡിയയാണ് കുഞ്ഞിന്റെ അന്ത്യകര്മ്മങ്ങള് ചെയ്തത്. മാതാപിതാക്കള് രണ്ട് വയസുകാരനെ ഉപേക്ഷിച്ചു പോയകാര്യം അറിഞ്ഞതോടെയാണ് കുട്ടിയുടെ അന്ത്യകര്മങ്ങള് ചെയ്യാന് തീരുമാനിച്ചതെന്ന് രോഹിത് ബേഡിയ പറഞ്ഞു. അന്ത്യകര്മം ചെയ്യാന് ആരുമില്ലാത്ത സ്ഥിതിയായിരുന്നുവെന്നും അതിനാലാണ് തന്നോട് അക്കാര്യം ആവശ്യപ്പെട്ടയുടന് മടിച്ചുനില്ക്കാതെ മുന്നിട്ടിറങ്ങിയതെന്നും അദ്ദേഹം വ്യക്തമാക്കി.
ബിഹാറിലെ ജാമുയി സ്വദേശികളാണ് മരിച്ച കുട്ടിയുടെ മാതാപിതാക്കളെന്ന് ആശുപത്രി അധികൃതര് പറഞ്ഞു. മെയ് പത്തിന് രാത്രി വൈകിയാണ് അവര് കുട്ടിയെ ആശുപത്രിയിലെത്തിച്ചത്. ശ്വാസതടസത്തെ തുടര്ന്ന് കുട്ടിയെ പീഡിയാട്രിക് വാര്ഡില് പ്രവേശിപ്പിച്ചു. കുട്ടിക്ക് പെട്ടെന്നാണ് ശ്വാസതടസം അനുഭവപ്പെട്ട് തുടങ്ങിയതെന്ന് മാതാപിതാക്കള് ഡോക്ടര്മാരോട് പറഞ്ഞു. തുടര്ന്ന് നടത്തിയ പരിശോധനയില് കുട്ടിക്ക് ന്യൂമോണിയ സ്ഥിരീകരിച്ചു. തൊട്ടടുത്ത ദിവസം ഉച്ചയോടെ കുട്ടിയുടെ കോവിഡ് പരിശോധനാ ഫലം പോസിറ്റീവായി. ഇതിന് പിന്നാലെയാണ് കുഞ്ഞിന്റെ മാതാപിതാക്കളെ കാണാതായത്.
മെയ് 11 ന് വൈകുന്നേരം കുട്ടി മരിച്ചു. ആശുപത്രിയില് നല്കിയ ഫോണ് നമ്പറുകളില് രക്ഷിതാക്കളെ ബന്ധപ്പെടാന് ശ്രമിച്ചുവെങ്കിലും ഫലമുണ്ടായില്ല. മൂന്ന് ദിവസം കഴിഞ്ഞിട്ടും രക്ഷിതാക്കളെ കണ്ടെത്താന് കഴിയാതിരുന്നതോടെയാണ് ജില്ല ഭരണകൂടത്തിന്റെ അനുമതിയോടെ കുട്ടിയുടെ മൃതദേഹം സംസ്കരിക്കാന് ആശുപത്രി അധികൃതര് തീരുമാനിച്ചത്.
