ഏറ്റുമാനൂര്‍: പാറമ്പുഴ ബത്ലഹേം പള്ളിയില്‍നിന്ന് 32 ലക്ഷം അപഹരിച്ച കേസില്‍ കൈക്കാരന്‍ കണ്ണൂരില്‍ പിടിയില്‍. തെള്ളകം കുറുപ്പന്തറ മുകളേല്‍ ദീജു ജേക്കബാണ് (45) ഗാന്ധിനഗര്‍ പോലീസിന്റെ പിടിയിലായത്. 2019 ആഗസ്റ്റില്‍ കൈക്കാരനായി ചുമതലയേറ്റ നാള്‍മുതല്‍ 2020 ഫെബ്രുവരിവരെയുള്ള കാലയളവില്‍ ബാങ്കില്‍ അടക്കാനുള്ള 31.5 ലക്ഷം രൂപ അടക്കാതെ അപഹരിച്ചതായാണ് പരാതി. മോഷണം പിടിക്കപ്പെട്ടതോടെ മാര്‍ച്ച്‌ രണ്ടിന് നാട്ടില്‍നിന്ന് മുങ്ങിയ ഇയാള്‍ കണ്ണൂര്‍ പയ്യാവൂരില്‍ ഉണ്ടെന്നറിഞ്ഞ് ഗാന്ധിനഗര്‍ പോലീസെത്തി പിടികൂടുകയായിരുന്നു.
പള്ളിയുടെ ബാങ്ക് അക്കൗണ്ട് കാത്തലിക് സിറിയന്‍ ബാങ്കിന്റെ കുമാരനല്ലൂര്‍ ശാഖയിലാണ്. പള്ളില്‍നിന്ന് ബാങ്കില്‍ അടക്കാന്‍ കൊടുത്തുവിടുന്ന പണം അടക്കാതെ ബാങ്കിന്റെ വ്യാജ സ്റ്റേറ്റ്മെന്റ് ഇയാള്‍ പള്ളികമ്മിറ്റിക്ക് നല്‍കി വരുകയായിരുന്നു. ബാങ്കിന്റെ വ്യാജസീലും ഇയാള്‍ ഉണ്ടാക്കിയിരുന്നു.
കഴിഞ്ഞ ജനുവരിയില്‍ ഇയാളെക്കുറിച്ച്‌ പള്ളികമ്മിറ്റിക്ക് സംശയം തോന്നിത്തുടങ്ങി. പെരുന്നാളിനോടനുബന്ധിച്ച്‌ പെയിന്റ് വാങ്ങിയ ഇനത്തില്‍ കട ഉടമക്ക് നല്‍കാനുണ്ടായിരുന്ന പണം പള്ളിയില്‍നിന്ന് ഇയാളുടെ പക്കല്‍ കൊടുത്തുവിട്ടെങ്കിലും നല്‍കിയില്ല. പിന്നീട് ബാങ്കില്‍ അടക്കാന്‍ കൊടുത്തുവിട്ട 20 രൂപ നോട്ടിന്റെ കെട്ടുകളാണ് പെയിന്റ് കടയില്‍ നല്‍കിയത്. ഈ വിവരം കടയുടമ പള്ളിയില്‍ അറിയിച്ചു. ഇതാണ് ദീജുവിനെ കുടുക്കാന്‍ ഇടയാക്കിയത്. തുടര്‍ന്ന് പള്ളി കമ്മിറ്റി ബാങ്ക് അക്കൗണ്ട് പരിശോധിച്ചപ്പോള്‍ 32.5 ലക്ഷത്തോളം രൂപയുടെ കുറവ് കണ്ടെത്തി.
പിടിക്കപ്പെടുമെന്നായപ്പോള്‍ ഇയാള്‍ മുങ്ങി. നഷ്ടപ്പെട്ട പണം വീട്ടുകാര്‍ നല്‍കാമെന്ന വ്യവസ്ഥയില്‍ പള്ളി കമ്മിറ്റി പോലീസില്‍ പരാതി നല്‍കിയില്ല. എന്നാല്‍ നിശ്ചിത സമയം കഴിഞ്ഞിട്ടും പണം നല്‍കാതെ വന്നതോടെ പള്ളി കമ്മിറ്റി ഗാന്ധിനഗര്‍ പോലീസില്‍ പരാതി നല്‍കി. ഇതിനിടെ ഇയാള്‍ കണ്ണൂരിലെ പയ്യാവൂരില്‍നിന്ന് നാട്ടിലെത്താന്‍ പാസ് എടുക്കാന്‍ തയാറാകുന്നതായി പോലീസിന് വിവരം കിട്ടി. ഉടന്‍ എസ്.ഐയുടെ നേതൃത്വത്തില്‍ പോലീസ് കണ്ണൂരിലെത്തി പിടികൂടുകയായിരുന്നു. വെള്ളിയാഴ്ച രാവിലെ സ്റ്റേഷനിലെത്തിച്ച്‌ അറസ്റ്റ് രേഖപ്പെടുത്തിയ ശേഷം ഉച്ചയോടെ പള്ളിയിലെത്തിച്ച്‌ തെളിവെടുപ്പ് നടത്തി. ഏറ്റുമാനൂര്‍ കോടതിയില്‍ ഹാജരാക്കിയ ദീജുവിനെ റിമാന്‍ഡ് ചെയ്തു.
