തിരുവനന്തപുരം: സംസ്ഥാനത്ത് നിയന്ത്രണങ്ങള് ഒഴിവാക്കുന്നതോടെ കോവിഡ് മരണസംഖ്യ ഉയര്ന്നേക്കാമെന്ന് മുന്നറിയിപ്പുമായി ആരോഗ്യമന്ത്രി കെ.കെ. ശൈലജ. എറണാകുളം മെഡിക്കല് കോളേജിലെ വികസന പദ്ധതികളുടെ ഉദ്ഘാടനം നിര്വ്വഹിക്കുകയായിരുന്നു ആരോഗ്യമന്ത്രി.
നിയന്ത്രണങ്ങള് നീക്കുന്നതോടെ സംസ്ഥാനത്ത് കോവിഡ് മരണസംഖ്യ ഇനിയും ഉയര്ന്നേക്കാം. രോഗികള് കൂടുന്നതോടെ വെന്റിലേറ്ററുകളും തികയാതെ വരും. പ്രായമുള്ളയാളുകളിലേക്കു രോഗം പടര്ന്നാല് വെന്റിലേറ്റര് തികയാതെ വരുമെന്നും മന്ത്രി പറഞ്ഞു.
രോഗികളുടെ എണ്ണം ഉയര്ന്നാലും ആരും റോഡില് കിടക്കേണ്ട അവസ്ഥയുണ്ടാവരുത്. എല്ലാവര്ക്കും ശ്രദ്ധ ലഭിക്കണം. കോളനികളില് രോഗം പടരാന് അനുവദിക്കരുത്. ഇക്കാര്യത്തില് എംഎല്എമാര് ജാഗ്രതയോടെ ഇടപെടണമെന്നും മന്ത്രി പറഞ്ഞു. യോജിച്ച പ്രവര്ത്തനം കൊണ്ടാണു സംസ്ഥാനത്തു കോവിഡ് മരണങ്ങള് അധികമാകുന്നതു തടയാന് സാധിച്ചത്. കക്ഷിരാഷ്ട്രീയ ഭേദമന്യേയാണു കോവിഡ് പ്രതിരോധ പ്രവര്ത്തനങ്ങളില് ആളുകള് ഇടപെടുന്നതെന്നും ആരോഗ്യമന്ത്രി കൂട്ടിച്ചേര്ത്തു.
