കോഴിക്കോട് : കോഴിക്കോട് ജില്ലയില് നിയമസഭ തിരഞ്ഞെടുപ്പ് വോട്ടെണ്ണലിന്റെ ഭാഗമായി താല്ക്കാലിക മദ്യനിരോധനം (ഡ്രൈ ഡേ) ഏര്പ്പെടുത്തി. 39 മണിക്കൂർ നേരത്തേക്കാണ് ജില്ലാ തിരഞ്ഞെടുപ്പ് ഓഫീസര് കൂടിയായ ജില്ലാ കളക്ടര് സ്നേഹില് കുമാര് സിങ് മദ്യ നിരോധനം ഏർപ്പെടുത്തിയത്. മെയ് 3ന് വൈകീട്ട് 6 മുതല് മെയ് 5 രാവിലെ 9 മണി വരെയാണ് ജില്ലയിൽ മദ്യനിരോധനം ഏര്പ്പെടുത്തിയത്. ഇത് പ്രകാരം ജില്ലയിലെ കള്ളുഷാപ്പുകള്, ബിവറേജസ് ഔട്ട്ലറ്റുകള്, മറ്റു വിദേശമദ്യ വില്പന കേന്ദ്രങ്ങള്, ബാറുകള്, ബിയര് – വൈന് പാര്ലറുകള് തുടങ്ങിയവ അടച്ചിടണം. ഹോട്ടലുകള്, റസ്റ്ററന്റുകള്, ക്ലബുകള് തുടങ്ങി മദ്യം വിളമ്പുന്നതോ വില്ക്കുന്നതോ ആയ എല്ലാ പൊതു – സ്വകാര്യ സ്ഥാപനങ്ങര്ക്കും നിയന്ത്രണം ബാധകമായിരിക്കും.
ഉത്തരവ് നടപ്പാക്കുന്നുണ്ടെന്ന് ഉറപ്പുവരുത്താന് കോഴിക്കോട് ഡെപ്യൂട്ടി എക്സൈസ് കമീഷണര്ക്കും സിറ്റി, റൂറല് പോലീസ് മേധാവിമാര്ക്കും കളക്ടര് നിര്ദേശം നല്കി. 1951 ലെ ജനപ്രാതിനിധ്യ നിയമത്തിലെ സെക്ഷന് 135 സി, കേരള അബ്കാരി ആക്ടിലെ യു / എസ് 54 എന്നിവ പ്രകാരം തിരഞ്ഞെടുപ്പ് കമീഷന്റെ നിര്ദേശപ്രകാരമാണ് നടപടി.
