തൃശൂർ : ജർമനിയിൽ ജോലി വാഗ്ദാനം ചെയ്ത് പണം തട്ടിയെന്ന കേസിൽ പ്രവാസി മലയാളി അസോസിയേഷൻ ജില്ലാ പ്രസിഡന്റ് അറസ്റ്റിൽ. ചേർപ്പ് പെരുമ്പിള്ളിശേരി പുന്നപ്പിള്ളിൽ സുനിത ശ്യാമളന്റെ പരാതിയുടെ അടിസ്ഥാനത്തിൽ അസോസിയേഷൻ നേതാവ് അനൂപ് വിശ്വനാഥൻ (40) ആണ് അറസ്റ്റിലായത്. 2018ൽ 2 ഗഡുക്കളായി 5 ലക്ഷം രൂപ ബാങ്ക് അക്കൗണ്ടിലൂടെ കൈപ്പറ്റിയെന്നതാണ് പരാതി. ജോലി വാഗ്ദാനവുമായി ബന്ധപ്പെട്ട് നെടുമ്പാശേരിയിൽ പ്രവാസി മലയാളി അസോസിയേഷൻ നടത്തിയ യോഗത്തിൽ സുനിതയെയും മകനെയും അനൂപ് പങ്കെടുപ്പിച്ചിരുന്നു.
ഈ യോഗത്തിൽ മോൻസൻ മാവുങ്കലും അനിത പുല്ലയിലും പങ്കെടുത്തു. യോഗം കഴിഞ്ഞപ്പോൾ അനിത പുല്ലയിൽ തന്റെയരികിലെത്തുകയും അനൂപിനെ ധൈര്യമായി വിശ്വസിച്ചോളൂ എന്നു പറയുകയും ചെയ്തതായി സുനിതയുടെ പരാതിയിൽ പറയുന്നു. പിന്നീട് പലവട്ടം അന്വേഷിച്ചപ്പോഴും അനൂപ് ഒഴിഞ്ഞുമാറുകയാണു ചെയ്തത്. മോൻസന്റെയും അനിതയുടെയും ചിത്രങ്ങൾ പത്രത്തിൽ വന്നപ്പോഴാണു സുനിത യാഥാർഥ്യം തിരിച്ചറിയുന്നത്. അനൂപിനെ റിമാൻഡ് ചെയ്തു.
