ലഖ്നൗ: ഉത്തര്പ്രദേശിലെ ഭൂരിഭാഗം സ്കൂള് കുട്ടികളും ഒന്നോ അതിലധികമോ ആരോഗ്യപ്രശ്നങ്ങള് അനുഭവിക്കുന്നവരാണെന്ന് സര്വേ റിപ്പോര്ട്ട്. 76 ശതമാനം സ്കൂള് വിദ്യാര്ഥികള്ക്കും ആരോഗ്യ പ്രശ്നങ്ങളുണ്ടെന്നാണ് സര്വേയില് പറയുന്നത്. ലഖ്നൗ കേന്ദ്രീകരിച്ചുള്ള ഗവേഷക സംഘമാണ് പഠനം നടത്തിയത്. ഒമ്പത് ജില്ലകളിലായി 3000 വിദ്യാര്ഥികള്ക്കിടയില് നടത്തിയ സര്വേയിലാണ് വിദ്യാര്ഥികള് വിവിധ ആരോഗ്യ പ്രശ്നങ്ങള് അനുഭവിക്കുന്നതായി കണ്ടെത്തിയത്.
ഡോ. എസ്. ഹൈദറിന്റെ നേതൃത്വത്തിലുള്ള സംഘമാണ് ലഖ്നൗവടക്കമുള്ള ഒമ്പത് ജില്ലകളിലെ 3114 വിദ്യാര്ഥികളുടെ ബോഡി മാസ് ഇന്ഡക്സ് (ബി.എം.ഐ- ശരീര ഭാര സൂചിക) , കായിക ക്ഷമത, ശാരീരിക പ്രവര്ത്തനം തുടങ്ങിയ പരിശോധിച്ചത്. 47 ശതമാനം കുട്ടികളുടെ ബോഡി മാസ് ഇന്ഡക്സും ആരോഗ്യകരമായ പരിധിക്കപ്പുറമാണെന്ന് പഠനത്തില് കണ്ടെത്തി. 59 ശതമാനം വിദ്യാര്ഥികള്ക്കും കാഴ്ചാ പ്രശ്നങ്ങളടക്കമുള്ള നേത്ര രോഗങ്ങളുണ്ടെന്നും നിരീക്ഷിച്ചു. 52 ശതമാനം പേര്ക്ക് പല്ലുകള്ക്കും വായക്കും അസുഖമുണ്ടെന്നും പഠനത്തില് വ്യക്തമായി. അസുഖങ്ങള് ജീവഹാനി വരുത്തുന്നതിന് മുമ്പേ കണ്ടെത്തുന്നതിന്റെ ഭാഗമായാണ് 20 വിദഗ്ധരടങ്ങിയ സംഘം സര്വേ നടത്തിയത്.
