ബെല്ഗ്രേഡ്: സ്കൂളിലുണ്ടായ വെടിവെപ്പില് എട്ട് കുട്ടികളും സുരക്ഷാ ജീവനക്കാരനും കൊല്ലപ്പെട്ടു. സെര്ബിയന് തലസ്ഥാനമായ ബെല്ഗ്രേഡിലാണ് സംഭവം. ഏഴാം ക്ലാസുകാരനായ വിദ്യാര്ഥിയാണ് വെടിയുതിര്ത്തത്. വ്ലാഡിസ്ലാവ് റിബനിക സ്കൂളിലാണ് വെടിവെപ്പുണ്ടായത്. പ്രാദേശിക സമയം 8.40 മണിയോടെയാണ് വെടിവെപ്പുണ്ടായെന്ന സന്ദേശം പോലീസിന് ലഭിച്ചതെന്ന് അധികൃതര് അറിയിച്ചു. പിതാവിന്റെ തോക്ക് ഉപയോഗിച്ചാണ് വിദ്യാര്ഥി വെടിവെപ്പ് നടത്തിയത്.
വെടിവെപ്പില് ആറോളം പേര്ക്ക് പരിക്കേറ്റിട്ടുണ്ട്. ഇവരുടെ നില ഗുരുതരമായി തുടരുന്നുവെന്നാണ് വിവരം. പരിക്കേറ്റവരില് ചിലരെ ശസ്ത്രക്രിയക്ക് വിധേയമാക്കിയെന്ന റിപ്പോര്ട്ടുകളും പുറത്ത് വരുന്നുണ്ട്. അധ്യാപകര്ക്ക് നേരെയാണ് വിദ്യാര്ഥി ആദ്യം വെടിയുതിര്ത്തതെന്ന് സ്കൂളിലെ വിദ്യാര്ഥിനികളില് ഒരാളുടെ രക്ഷിതാവായ മിലന് മിലോസെവിക് പ്രതികരിച്ചു.
